الأنوثة في بنات السودان......؟

البنت السودانية بطبعنا نحن اولاد السودان المقيممين في الخرطوم بنعرف البنت كويس في التصرفات يعني الواحدة في البيت زي الوحش تعمل ليك فيها في الجامعة انسانة رقيقة حنونة عاطفية مسكينة قليلة الكلام لكن ده كلو تكليف من البنت عشان تجذبك.

تعمل فيها انثى وهي ما عندها علاقة بالانوثة عليكم الله شوفو بنات الامارات او السعودية ولا بنات الكويت عشان تعرفو شنو معنى الانوثة.

وانا عن نفسي بناتنا الفي السودان ديل ما شايف عليهم انوثة الا الواحدة يعلموها كيف تبقى انثى جذابة

ما تذعلو يا بنات لكن ده الشايفو انا فيكم

اقتباس : المشاركة الأصلية كتبت بواسطة يسألوني [ مشاهدة المشاركة ]

البنت السودانية بطبعنا نحن اولاد السودان المقيممين في الخرطوم بنعرف البنت كويس في التصرفات يعني الواحدة في البيت زي الوحش تعمل ليك فيها في الجامعة انسانة رقيقة حنونة عاطفية مسكينة قليلة الكلام لكن ده كلو تكليف من البنت عشان تجذبك. تعمل فيها انثى وهي ما عندها علاقة بالانوثة عليكم الله شوفو بنات الامارات او السعودية ولا بنات الكويت عشان تعرفو شنو معنى الانوثة. وانا عن نفسي بناتنا الفي السودان ديل ما شايف عليهم انوثة الا الواحدة يعلموها كيف تبقى انثى جذابة ما تذعلو يا بنات لكن ده الشايفو انا فيكم

عزيزي يسالوني تحياتي ليك

مين في الدنيا دي أجمل من بناتنا

الليهن قلوبنا و الفيهن صفاتنا

الكامنات في روحنا و العايشات في ذاتنا


كما قال الراحل المقيم أبو آمنة حامد وتغني وردي


فالذي نفسه بغير جمال لا يري في الوجود شيئا جميلا

فالجمال موجود في كل مكان لكن الجمال الاصلي موجود في السودان

كما تغني اللحو .

واليك مقطع اغنية وردي كاملة ربما تغير فيك شي




بنحب من بلدنا ما بره البلد
سودانية تهوى عاشق ود بلد
في عيونها المفاتن شي ما ليه حد
***
التوب المهفهف فوق أم الضفائر
و الخد المعطر زي أحلى الأزاهر
و الخطوة الأنيقة ترنيمة مشاعر
أنا بي كلو عمري بمشيلها و بسافر
***
مين في الدنيا دي أجمل من بناتنا
الليهن قلوبنا و الفيهن صفاتنا
الكامنات في روحنا و العايشات في ذاتنا
***
في حلفا البداية أحلامي و هنايا
أنا عايش لحبي المخضر برايا
النافرة الأليفة ست روحي و هنايا
***
أنا لي في كريمة شايقية في شلوخها
نعتز بي صفاتها ما نجهل تاريخها
ماها المابية ريدتي و مو ياها المسيخة
***
في شندي العظيمة تلقى بنات جعل
واحدات في المتمة في لون العسل
النايرات خدودهن زي فجرا أطل
***
في سنكات بنعشق بت سمرا و أبية
ترتاح في الضفيرة خصلاتها الغنية
عاشت في شعوري أحلى هدندوية
***
الوارثات جدودهن في الجود و الشجاعة
البظهر جمالهن من زمن الرضاعة
سودانية مية المية في ذوقها و طباعها
يا ناس أرحموني أنا قلبي في رفاعة
***
لوزة القطن اليانعة السمحة و نضيرة
تتنى الحليوة في مشية أميرة
أجمل حب عندي في قلب الجزيرة
***
لي في الغرب أغيد في دار حمر و البقارة
نحميها بسيوفنا تفاحها و نضارها
تسكرنا الليالي و تطربنا النقارة
***
لي في جوبا ساحر تسلم لي خدوده
يمرح في غاباته و يسرح في مروده
حبي الغالي ليه ما بعرف حدوده
***

اخي يسألوني
بعدين امشي جيب ليك واحده بلوشية من الامارات او بدونية من الكويت او بدوية من السعودية.
نحن بناتنا الحمدلله عيونا مليانات بيهم (عفة ,ثقافة,اخلاق وحشمه)
شوف عيني الحبيب بحشمه لابسة التوب
يا أخواني الجمال في كل مكان موجود
لاكن الجمال الاصلي في السودان
انت يا اخوي باقي عليك تتفرج في الفضائيات كتير

بصراحة ما قصرتو يا شباب وكلامكم مية مية وبشكركم كتير لانكم نظرتكم ما سطحية وانت يا اخ يسالوني ما اقول الا الله يعينك لانك ما شايف اي زول حلو وده دليل علي انه عندك نقص معليش يعني وزي ما قال اخونا طلال حلفاوي والذي نفسه بغير جمال لا يرى شيئا في الوجود جميلا وانحنا ما محتاجين لي زول يقول عنننا جميلات والله لا لانه واثق الخطى يمشي ملكا وانحنا اكتر بنات يمكن نكون كاملات علم واخلاق وجمال اتحادك تجيب لي واحدة سعودية او اماراتية او كويتية معاها شهادة جامعية او ماجستير وبعدين بنات الامارات اتلعاجبينك ديل على فكرة الامارات اغلبها متجنسين يعني ما اماراتيات اصليات

لالا حرام عليك الانووثة كلها عند بنات السودأن !!

ما بعرف بس انا شايفاهم عاديات مافيهم انوثه زايده ولا هم معدومي الانوثه !!
والشي لو زاد عن حدو انقلب ضده ولا شنو ؟

بعدين انت عايز تتعلم الانوثة اكتر من كده لشنو ...

انا شايفه انو اكتر من كده ما حيكون حلو يعني ما حصل قابلت بت سودانية خشنة

بالله صحي تعال شوف السعودية والامارات والكويت المخدوع بيهم ديل .. من شدة ما الانوثه معدومة عندهم

بيقلبوا نفسهم اولاد !

اقتباس : المشاركة الأصلية كتبت بواسطة يسألوني [ مشاهدة المشاركة ]

عليكم الله شوفو بنات الامارات او السعودية ولا بنات الكويت عشان تعرفو شنو معنى الانوثة.

بس هنا قصدك شنو البت السودانية العايشة في السعودية والامارات ولا البت السعودية او الاماراتية . .؟

يسألوني .. تراك ظلمت بناتنا أكثر من ذلك المسمى راغب علامة ...
أمهاتنا وأخواتنا وبنات الحي والحارة كتب عليهن التضحيات في الحياة ...
يتحملن مسئوليات تنأى عن حملها الجبال ...
هؤلاء اللاتي نصفهن بقلة الأنوثة هن اللائي يكدحن في المدارس والمصانع والمكاتب والمستشفيات من أجل توفير لقمة العيش لأسرنا الكبيرة، في حين نجد أن بعض "شبابنا الناعم" يجلسون تحت ظلال الأشجار يتبادلون المقص لتزيين شعورهم ثم يدخل الواحد إلى البيت ليجد الفطور أوالغداء جاهزا ويا ويل الأخت إن كان بنطلون الحفلة غير مكوي ...

يسألوني بسألك ..
مين في الدنيا ديا أجمل من بناتنا ؟؟؟
أنا عن نفسي بقول ما فيش...

تحياتي وودي.
بناديها.

البنت كلها انوثة وحنان
يابنات الاولاد ما بيقدرو يعيشوا
بدون البنت
اطلب من كل البنات تعطي شاكوش مؤقت لصديقها
اوكي
يلاجربوا

البنت كلها انوثة وحنان
يابنات الاولاد ما بيقدرو يعيشوا
بدون البنت
اطلب من كل البنات تعطي شاكوش مؤقت لصديقها
اوكي
يلاجربوا

ياخي بصراحة انت غياظ شديد

اقتباس : المشاركة الأصلية كتبت بواسطة خال محمود [ مشاهدة المشاركة ]

ياخي بصراحة انت غياظ شديد