.:: إعلانات النيل الازرق ::.

أهلا وسهلا بك إلى منتديات النيل الازرق السودانية.
أهلا وسهلا بك زائرنا الكريم، إذا كانت هذه زيارتك الأولى للمنتدى، فيرجى التكرم بزيارة صفحة التعليمـــات، بالضغط هنا. كما يشرفنا أن تقوم بالتسجيل بالضغط هنا إذا رغبت بالمشاركة في المنتدى، أما إذا رغبت بقراءة المواضيع والإطلاع فتفضل بزيارة القسم الذي ترغب أدناه.
العودة   منتديات النيل الازرق السودانية > منتديات الأدب والفنون > منتدى القصص والحكايات

منتدى القصص والحكايات يختص بسرد القصص والروايات المختلفة

الإهداءات

إضافة رد
 
أدوات الموضوع انواع عرض الموضوع
قديم 13-03-2018, 02:49 PM   #1
الادارة



الصورة الرمزية يوسف مدير
يوسف مدير غير متصل

بيانات اضافيه [ + ]
 رقم العضوية : 11520
 تاريخ التسجيل :  Jul 2011
 أخر زيارة : اليوم (01:55 PM)
 المشاركات : 8,635 [ + ]
 التقييم :  5203
 الدولهـ
Sudan
 الجنس ~
Male
 SMS ~
1000
 اوسمتي
وسـام المشـاركـات المميـزة وسـام التواصـل المميـز 
لوني المفضل : Blue
افتراضي صراحة مدعومة.. بقلم: طارق اللبيب



نقدم لكم في هذه المساحة احد اروع روايات الكاتب طارق اللبيب ( صراحة مدعومة).... ارجو ان تنال رضاكم واعجابكم ان شاء الله...
متابعة شيقة لاحداث الرواية...

صراحة مدعومة ..
الحلقة 1
بقلم طارق اللبيب ..
السلام عليكم ياحاج عمر ..
قال ليهو عليكم السلام ادريس .. وين ياخي ليك زمن مان شايفنك ان شاء الله روقة ياخي؟ .. قال ليهو والله الحمد لله اخدت لي سفرة كدي وجيت كيف انت وكيف صحتك؟
قال ليهو والله الحمد لله ..
ادريس جا لحاج عمر في مكان ..زراعتو وداير يتكلم في موضوع ..كدي النسمع نشوف الحاصل شنو؟
قال ليهو والله ياحاج عمر جاييك في موضوع .. كدي خت الطورية دي.. وتعال لي جاي على الضل ..
حاج عمر قال ليهو حبابك والله .. النفك الفطور ده.. تفطر معاي .. قال ليهو انت لاهسي ياحاج عمر مافطرت ؟؟ نحن الحمد لله فطرنا وشربنا الشاي والقهوة .. ياخي الساعة ماشة على 12 ..
قال ليهو والله انشغلت مع الجدول ده.. مقفول بالقش .. حامي الموية تمشي .. والله ناسي نفسي شبعان ولا جعان .اكان ما جيتك دي.. لاهسع ما كون جايب خبر ..
اها قول خبرك شنو؟ .. ان شاء الله خير ..
ادريس قال ليهو يازول خير تب.. انت خت فطورك وافطر .. وانا بنتظرك.. قالو الكلام مع الزول جيعان مو سمح ..
المهم حاج عمرقعد يفطر .. وادريس شايل ليهوعود..بشخت في الواطة .. وساكت ساي .. حاج عمر قال في نفسو والله الليلة ادريس ماهو براهو .. الزول ده شايل ليهو هم وكلام كبير خلاص ..كدي الناكل سريع واشوف خبرو ..
غايتو سريع سريع.. الراجل لقم ليهو قلم كبار .. من ملاح البامية المفروكة .. مع الكسرة وغسل ايدو وشرب .. ولم المواعين .. ربطهن في فوطتهن الجابوهن فيها .. وجا قعد اتفرجخ في الواطة ..
وقال ليهو اها جيتك آدريس اخوي .. قول انا سامع ..
قال ليهو الحقيقة والله انا جاي شاكي ليك ولدك الباقر ده .. قال ليهو ولدي انا؟ الباقر؟ مالو ان شا الله خير؟ ..
قال ليهو والله الولد باقي لي بتي هنادي في رقبتها .. كل مايلاقيها في شارع يتكلم معاها .. ويشاغلها .. وهي الله يحفظها مابتدس علي حاجة .. اي كلمة قالا ليها كلمتني بيها .. وانا بقول ليها ماتردي عليهو .. امشي بس ..
لكن الزول ده كترها.. وانت عارف انا زول احمق.. وابرتي مابتشيل خيتين .. وبعد كدي خلاص ضاقت بي.. دحين امسك ولدك من بتي ياحاج عمر ..
وهسع اليومين ديل شغال معاها رسايل في الموبايل ..
وكل مرة البت تجيب الموبايل وتجيني وتقرا لي الكلام البكتبو ليها..
حاج عمر اتعدل في قعدته وقال ليهو ..
امكن ولدي دايرها .. بتك دي بت مابتتلقي في الزمن ده البت البتوري ابوها بي كل صغيرة وكبيرة على الطلاق دي بت زيها نادر
ازول اقول لك كلام أنا بتك دي دايرها لي ولدي الباقر ده .. شنو قولك؟ .. مادام عاجباهو بشاغل فيها.. خلنا النديها ليهو بالحلال ..
ادريس قال ليهو والله يا حاج عمر انت نسبك ما بنرفضو.. لكن ولدك البشاغل البنات ده مابنفع معانا .. انا بتي بت مابتقبل الخمج ومن هسي .. مابتقبل بي ولدك وانا بعرفها
بعدين ياخوي ولدك كان دايرها فعلا كان جابك وجا بالباب .. لكن شغلة المشاغلة والتغزل في بنات الناس دي والله ما حاجة بتشرف الراجل ..
قال ليهو والله يا ادريس الباقر ولدي زول كويس.. وماحصل في زول شكى منه الا الليلة .. والبنات كلهن بتمننو .. لكن بس اظنها بتك ملكت قلبو وغلبو الصبر ..
كدي انت ماتستعجل .. امشي اسأل البت .. وشوف ردها كان قالت لا
ماعندنا مشكلة ..وان وافقت دا والله ياهو المنى .. وانا اول زول بفرح بيها دي بت والله ما بتتخلا ..
قال ليهو والله انت ياحاج عمر كلامك ما بنزاد.. لكن والله ولدك ده انا تب مومطمني .. لكن مافي مشكلة ..انا بمشي بسأل البت وبشوف خبرها ..
قال ليهو امشي يا ادريس .. وانا من الليلة ولدي تاني بتك مابقرب من جيهتها .. اكان اديتونا ليها ولا ابيتو.. الا تبقى مراته ان واقفت ..قال ليهو تكرم ياحاج عمر وان شاء الله مانعدمك
مع السلامة ..
والنشووووف ..
الى اللقاء فى الحلقة الثانية


 
 توقيع :



تعجز كل مفردات الشكر والإجلال للرائعة صاحبة الذوق العالي رؤى


رد مع اقتباس
قديم 13-03-2018, 02:51 PM   #2
الادارة



الصورة الرمزية يوسف مدير
يوسف مدير غير متصل

بيانات اضافيه [ + ]
 رقم العضوية : 11520
 تاريخ التسجيل :  Jul 2011
 أخر زيارة : اليوم (01:55 PM)
 المشاركات : 8,635 [ + ]
 التقييم :  5203
 الدولهـ
Sudan
 الجنس ~
Male
 SMS ~
1000
لوني المفضل : Blue
افتراضي



صراحة مدعومة .
الحلقة 2
بقلم طارق اللبيب ..
ادريس مشى البيت وقبل ما يتكلم مع بتو في اي موضوع .. كورك للمراة ام هنادي .. عمك ادريس عندو تلاتة بنات .. هنادي وهدى وسلسبيل الصغيرة .. وماعنده ولد .
زوجته اسمها منى بت الحاج .. المهم يازول .. كورك يامنى ؟ قالت ليهو ايوة سامعاك .. قال ليها انتي وين..
قالت ليهو انا في المطبخ .. قال ليها .خلي اي حاجة في يدك وتعالي ..
جات تمسح في يديها بي فوطة من البلل.. كانت بتسوي في شنو ما معرو ف
قال ليها اقعدي هنا يامنى .. قالت ليهو اها خير.. انت من تصر حواجبيك ديل .. وتطير عيونك؟؟ معناها جايب لك بلوى.. قول ..
قال ليها انا مشيت اتكلمت مع حاج عمر.. عن تصرفات ولده مع هنادي .. وقال قال قال ..
انتي رايك شنو قبل ما نسأل البت؟ ..
قالت ليهو والله عاد الموت حار.. الولد ده انا ماشايفة عليهو اي عيب.. زول في شغله.. وفي حاله.. ولو ما كلام هنادي ده .. والله ماكنت عارفة عليهو شي .. قال ليها والله انا ذاتي شايفو زول محترم شديد .. بس زي ماقلتي من حركاته مع هنادي دي كرهتو وكرهت جيهتو ..
يعني هسي انتي لو هنادي وافقت.. ماعندك مانع؟ قالت ليهو هنادي مابتوافق .. انا عارفاها ..
قال ليها كدي انتي جربي معاها .. انا لو قلت ليها بتوافق.. حتى لو ماعايزاهو لانها مابتكسر لي كلمة .. وانا دايرها تكون بي راحتها.. وتختار بي حريتها .. ماتجامل في حياتها .. لا ابوها ولاغيرو ..
منى قالت ليهو والله مرات انت عندك كلام حكم ..
قال ليها عليك الله خلي المطاعنة.. وامشي شوفي لي خبرها .. ادريس امهر نجار في المنطقة .. وبتو الكبيرة هنادي دي.. طلعت من المدرسة من تالتة ثانوي .. عشان تساعد ابوها لانو ماعندو اولاد ..
ماعندها علاقات ولاصداقات .. الا صديقة واحدة من الجيران اسمها شروق ..
ادريس عندو معرض في البيت فاتح في الشارع .. والورشة في عريشة جوة البيت .. بشتغل دواليب وسراير وحافلات وهلم جرا .. كتير مرات هنادي بتكون ماسكة المنشار او الفارة .. وشغالة في الورشة زي الراجل .. وهو بكون قاعد برة في المعرض ..
البت اتعلمت الصنعة وبقت ماهرة جدا .. وابوها مبسوط منها .. وطوالي بقول هنادي بتي وولدي ..
اختها الاصغر هدى مدلعة ومابتشتغل .. امها مابتساعدها جنها نوم .. حنكوشه شديد .. لكن زولة صادقة.. وماعندها لف ودوران .. ولسه بتقرا في الثانوي في تاني ..
وسلسبيل دي صغيرة في خامس .
اها قامت منى مشت تتكلم مع هنادي .. عشان تشوف رايها في الكلام الجديد ده شنو لقتها بتصلي في الظهر .. انتظرتها لمن صلت .. الزولة دي صلاتة طويلة وكتيرة المراة دي قاعدة قريب النص ساعة .. عشان البت تخلص وتجيها ..
انتهت من صلاتها.. ولمت المصلاية وعاينت لامها كدا .. قالت ليها مالك يا امي قاعدة متمحنة كدا. شكلك عندك كلام عايزة تقوليهو لي .. قالت ليها متمحنة في صلاتك الزي التراويح دي ..
قالت ليها في شنو يا امي احكي؟ .. الموضوع ماصلاتي .. اها ..
قالت ليها كويس تعالي يا هنادي ..
طبعا حصل حصل .. وعمك حاج عمر قال قال .. انتي رايك شنو؟
قالت ليها والله يا امي ما اكذب عليك .. انا الزول ده كرهتو وزهجت منو .. لانو ضايقني شديد .. وكرهني الشارع والتلفون .. مافي واحد من ناس الحلة بتكلم معاي غيرو ..
اها قالت ليها طيب احتمال الزول ده بريدك يا فلانة ..
قالت ليها بريدني.. مايجي يدق باب ابوي ؟ قالت ليها عايز يتاكد منك اول .. يشوفك انتي شعورك كيف ..
قالت ليها ابوي رايو شنو؟
قالت ليها ابوك قال الولد كويس .. وانا قلت كويس .. ماعارفين عليهو اي حاجة غير عوارتو المعاك دي ..
قالت ليها خلاص اديني فرصة افكر وبرد ليكم ..
لمن امها فاتت بقت تفكر .. ضربت تلفون لشروق .. قالت ليها انتي وين يا متخلفه؟ قالت ليها انا قاعدة في البيت.. مالك شكلك عندك مصلحة معاي.. مابتضربي لي الا يكون عندك مصلحة يا نجارة .. قالت ليها اي والله محتاجة ليك شديد.. تعالي في شمار ما بيقعد دقيقة الهوا بشيلو ..
ديك بس لفحت اقرب توب بتاع امها .. وكشتت سفنجة اختها بتاعة الحمام .. وجات ..
قالت ليها ازيو المافي زيو .. كيفك يا نجاره .. اها الشماااار شنو ؟؟
هنادي قالت ليها ينجروك دولاب .. تعالي اندمسي هنا أسالك ..
انا مش حكت ليك عن حركات الود الاسمو الباقر ولا زفت ده؟
قالت ليها ايوة حكيتي لي.. اها مالو تاني عمل شنو الاهبل؟
قالت ليها كدي خليهو عمل شنو ؟ انتي قلتي لي الزول ده ماحصل عاين ليك معاينة ماياها كلو كلو صح ؟
عليك الله يا شروق احكي لي الزول ده . اوعا يكون تافه زيو وزي التانين ..
قالت ليها يعني انتي ما حنك معاك مثلا" بتكذبي علي؟
قالت ليها انا مابتكلم عني انا .. انا بتكلم عن انو هل ممكن يكون.. اتكلم مع بنات تاني غيري ..؟؟
شروق قالت ليها .. عليك الله ماتوتري لي اعصابي وتخليني اقوم اديك كف .. وريني الحاصل شنو؟
قالت ليها ياستي الراجل ابو الباقر.. قال لابوي دايرين بتك هنادي للباقر..
شروق قالتليها .. اوورووورك .. خلاص يايمة الود ترا جادي ..
وماشغلة شفع ..
قالت ليها الجدادة التمعطك .. يامتخلفة.. كدي انتي افهمي اول وبعدين قولي اورورووك ..
الموضوع انو ابوي مشى ليهو اول.. وكلمه بحركات ولده معاي. قالت ليها انتي ياعبيطة مشيتي كلمتي ابوك؟
قالت ليها ابوي صاحبي .. وانا خايفة الكلام يصله من حتة تانية . احسن يكون عارف البحصل ولاشنو؟
قالت ليها والله افكارك عينة طيب .. اها وطوالي قال ليهو نحن عايزنها ليهو؟؟؟ قالت ليها نعم ..
اها ياشروق والله انا متوترة .. وماعارفة اقول شنو؟ الولد شكلا عاجبني والله.. لكن خايفة يكون تافه وحقير .. وبعمل كدا مع البنات ..
شروق قالت ليها غايتو انا شخصيا ماحصل شفت منه شي .. لكن اقول ليك . طبعا انتي ماشاء الله عليك جمالك لايقاوم .. لكن انا مع شنو.. والبعاين لي منو .. كدي انتي علاقتك بي هدى اختك كيف؟
قالت ليها والله ياهو كلامنا في حدود .. انتي قصدك شنو يعني؟ ..
قالت ليها طبعا ياهنادي مع اعتذاري يعني.. هدى احلا منك هه.. ولو الود ده . لو فعلا تافه ح يكون اتكلم مع هدى برضو .. انتي اسألي منه هدى .. انا متأكدة انو هدى دي نص اولاد الحلة شاغلوها ..
قالت ليها والله ياشروق فكرتك دي قوية وشيطانية في نفس اللحظة ..
جدا خليني ادردق ليك هدى .. حتى لو ماهي ممكن تكون عارفة عن واحدة من صحباتها ..
شروق قالت ليها غايتو ياهنادي الزول ده لو طلع ماسورة تبقى مغسة .. والله انا دايراهو ليك.. لانه غايتو شكلو يجنن .. لكن الكلام على الجوهر على قولك ..
المهم ياجماعة البنات اتونسن كويس .. شروق وهنادي.. واتفقو على انو هنادي تحاول تعرف حاجة من اختها هدى .. هدى لسه في المدرسة ..
لمن جات المدرسة لابسة .. اللبس الرمادي .. وشايلة شنطة مرسوم عليها واتساب . هدى طالعة لامها منى .. زولة بتحب المنجهة .. ومتمدنة .. لانو منى اصلا من الخرطوم مولودة في الجريف غرب .. ادريس كان صاحب خالها واتزوجها وجا سكنها هنا في الريفي الشمالي لامدرمان ..
مسافة الحلة دي مابعيدة من امدرمان اصلا ..
يعني بتعتبر مدينة عديل. يهودا الزلط من هنا خمسة شوارع .زلط الكلية الحربية البمشي بي غرب النيل من شارع الوادي لغاية المتمة بس المنطقة قريبة من امدرمان .. بالمنسبة ناس المنطقة ديك ناس عجيبين خلاص .. لسع بي طيبة البلد والتمدن ما اثر فيهم ..
ياخي ديل في الزواج بكيلو اللحمة بالكوريك للضيوف ..
المهم يازول هنادي نادت اختها قالت ليها تعالي يا حبيبة اختها .. هدى عاينت ليها كدا بطرف عينها وقالت ليها .. من متين ياعيني الحنية دي ؟ لالا لازم عندك هدف سامي عايزاهو مني ..
قالت ليها ايييواا صحيح ..
جات هدويه قعدت بهدوم المدرسة ..قالت ليها اها خلصيني انا مسخنة ودمي فاير ..
قالت ليها ياستي عايزة اسألك من الباقر عمر .. بتعرفيهو صح؟؟
قالت ليها بعرفو ايوة مالو؟
قالت ليها الزول ده رايك فيهو شنو؟ يعني عندي صحبتي بتسأل منه ..
قالت اتقدم ليها وكدا.. انا غايتو قلت ليها الزول ده سئ وبتاع بنات ..
هدى قالت ليها وانا علاقتي شنو بالموضوع؟؟ يعني انا بجيب اخبار الاولاد السخف ؟
قالت ليها لالا ياهدو انتي مفتحة.. وعارف البلد والحاصل فيها .. وعندك صاحبات مازي انا.
الى اللقاء فى الحلقة الثالثة.


 
 توقيع :



تعجز كل مفردات الشكر والإجلال للرائعة صاحبة الذوق العالي رؤى


رد مع اقتباس
قديم 15-03-2018, 01:42 PM   #3
الادارة



الصورة الرمزية يوسف مدير
يوسف مدير غير متصل

بيانات اضافيه [ + ]
 رقم العضوية : 11520
 تاريخ التسجيل :  Jul 2011
 أخر زيارة : اليوم (01:55 PM)
 المشاركات : 8,635 [ + ]
 التقييم :  5203
 الدولهـ
Sudan
 الجنس ~
Male
 SMS ~
1000
لوني المفضل : Blue
افتراضي



📚طارق اللبيب
صراحة مدعومة
الحلقة الثالثة.
بقلم طارق اللبيب📚

هدى قالت ليها والله صراحة ياهنادي .. الزول ده
مابعرف عنه حاجة .. بﻼقيني في الشارع هو ماشي
شغله .. وانا ماشة المدرسة .. بسلم علي بكل ادب ..
ماحصل يوم حسيت احساس انو كدا وﻻ كدا ..
قالت ليها طيب وﻻسمعتي عن صحباتك؟ .. قالت ليها
ابدا والله ..
انتي عارفة صحباتي فضايح.. وبحكو لي بعض .. لو في
واحد ساي عاين لواحده منهم .. تعملو موضوع وتبرمج
بينا اليوم كله ..
ماقالو عن الزول ده شي والله ..اها تاني طالبة مني حاجة
غير كدا؟
قالت ليها ابدا .. شكرا ليك ..
اها هنادي بقت شبه اطمأنت كدا .
المهم قعدت تفكر .. ياربي امشي طوالي اوافق ﻻمي
وابوي .. يقولو البت الخفيفة دي .. كدي خليني يوم
يومين كدا .. لمن يٍسألوني بوريهم ..
بالمساء كدا جاتها رسالة من الباقر في تلفونها ..
مساء الخير .
قرت الرسالة وماردت ..
كتب ليها تاني .. ياناس ماتعبرونا .. انا منتظرك
تعطفي علي ولو مرة واحدة ..
طبعا ياها نفس الرسايل البكتبها ليها كل مرة ..
وعادة هي لمن تجيها رسالة زي دي منو ..
مابترد ليهو .. مرة واحدة ردت ليهو قبل كدا قالت ليهو
لو سمحت تاني ماترسل لي هنا ..
اها يازول المرة دي .. لمن كتب ليها الرسالة دي .. ردت
ليهو ..
كتبت .. ‏( اهلين .. الباقر .. كيفك ‏) ..
كتب ليها .. ياهﻼ ياهﻼ .. انا الليلة اﻻرض مابتشيلني
من الفرحة .. انا من متين منتظر منك الرحمة والحنان ده
.. الليلة الحصل شنو؟ خﻼك تردي لي كدا؟
كتبت ليهو .. ﻻنو اﻻمور اتغيرت ..
رد ليها . اتغيرت كيف؟
قالت ليهو .. ﻻنه الكﻼم وصل الكبار ..
قال ليها كيف يعني ؟ مافاهم؟؟
قالت ليهو سأل ابوك ..
قال ليها أسال ابوي اقول ليهو شنو؟ انتي عملتي شنو
يا بت؟ اوع يكون مشيتي فتيتيني ؟؟
اها تاني ماردت ليهو .. وعرفت انو لسه ماعرف الكﻼم من
ابوهو ..
قفلت التلفون .. وبقت خايفة انها تكون بوظت
الموضوع .. اظنو رسل ليها 15 رسالة .. بسأل عن
كﻼمها ده .. معناهو شنو؟ وهي تاني ما ردت ليهو .. في
النهاية قال البت دي شكلها بتخوف فيني .. ما اكتر ..
وما اكترث للموضوع ..
هنادي ضربت لي شروق .. حكت ليها كﻼم هدى
.. وقالت ليها انا غايتو اتصرفت تصرف .. ماعارفة صح
وﻻ غلط .. رسل لي ورديت ليهو كيت كيت ..
قالت ليها غلطانة وستين غلطانة .. انتي مالك ومال
ابوهو؟ كان تحافظي على شخصيتك اﻻولى .. خﻼص
بس ماصدقتي طلبوك وقمت تتراشقي .. غايتو جنس
خفة !!
قالت ليها عارفة ياشروق .. انا والله خايفة انو الباقر ده
يكون ماجادي ..
وزيو وزي الغيرو وﻻ ماكدا؟..
قالت ليها انتي اصبري وشوفي النتايج ..
المهم يازول هنادي ماقدرت تصبر اليومين قامت بكرة
. قالت ﻻمها .. يا امي ابوي سألك تاني من الموضوع؟
قالت ليها ما اتكلمنا فيهو تاني .. انتي بقيتي على شنو؟
قالت ليها انا والله ماعندي مشكلة .. لكن ﻻهسي انتو
ماعرفتو راي الولد .. الطلب جاي من ابوهو موش كدا؟
طيب انا ما حيتزوجني ابوهو .. ﻻزم ابوي يسمع من
صاحب الشان ..
المهم ... المراة كلمت راجلها ادريس .. وقالت ليهو
هنادي ماعندها مشكلة .. وموافقة بالموضوع .. امشي
في الموضوع ..
اها زووول طالت اﻻيام .. وعمك حاج عمر بالليل انتظر
ولده لمن جا
ﻻنه الباقر بعد مايجي من الشغل .. بتغدى ويستحمى
والعصر بطلع
يجي بعد العشاء ..
الباقر عنده اخو اكبر منه اسمه حسين .. وبتين تومات
اصغر ليميا ولينه 21 سنة ..
اهااا عمك حاج عمر . قال ليهو تعال لي يا الباقر عاوزك
.. هنا طبعا الباقر قلبو تح ترح ترح ترح .. ياربي هنادي
تكون كلمت الحاج ده والليلة غايتو بغطس حجري ..
جاهو قال ليهو ايوة يا ابوي .. جيتك مالك مساهر
الليلة؟ .. قال ليهو مساهر راجيك ..
قال ليهو ان شاء الله خير يابوي .. جرا الكرسي وقعد
قدامو .. وابوهو قاعد في السرير .. قال ليهو بتعرف
هنادي بت ادريس النجار يا الباقر؟
قال ليهو ايوة بعرفها ..
قال ليهو.. رايك فيها شنو؟ دايرين نخطبها ليك ..
قال ليهو والله مافيها كﻼم .. لكن انت فاجأتني
بالموضوع .. خليني افكر في الموضوع .. واديك الخبر
اﻻكيد ..
ابوهو قال ليهو انت يازول مستهبل وﻻشنو؟؟ .. انت
ما اصلك ساكها ومكرها الحلة والتلفونات .. تقول لي
داير افكر؟
الباقر حاول يحول الموضوع بسرعة .. ﻻنه شكله مفضوح
قدام ابوهو ..قال ليهو ابوي لكن في مشكلة .. كيف انا
اتزوج قبال حسين اخوي ..
المفروض الترتيب ؟
قال ليهو انت القالك منو ح تتزوج قبالو .. بس هسي
دي شورة .. بعدين اقول لك حاجة .. انا كلمتك عشان
يكون عندك خبر .. لكن انا طلبتها وانتهيت ..
هنا طبعا الباقر ارتبك ارتباك شديد .. ﻻنه اصﻼ لمن
كان بعاكس في هنادي .. ماعايزها مراة مستقبل ..
سامع عنها في الحلة اقاويل .. وعارف انو سمعتها ما
تمام ..
قال ليهو ياابوي .. انت ممكن تحكي لي القصة شنو؟
انت عرفت كيف اني ساكيها؟ وطلبتها لي متين؟
وكيف ؟
قال ليهو يازول امشي .. انا ماعايز معاك كﻼم تاني ..
كلمتك عشان يكوون عندك علم ..
المهم الباقر مشى من ابوهو وما اداهو اي رد .. مشى رقد
في السرير غلبو النوم .. قاعد يفكر .. وماعارف الموضوع
ده اصﻼ تمه بي ياتو طريقة ..
وحسه فعﻼ" بي انو هو اتورط .. واتخوزق في انسانة ..
ما كان بتمناها زوجة ..
بالليل كدا ضرب لصاحبو .. من اوﻻد الحلة اسمو كمال
.. صحاهو من النوم ..
قال ليهو ..الو كمال .. كيف الحال نايم وﻻشنو؟
قام الزول صوتو متغير شكلو جرس التلفون صحاهو ..
من سابع نومة .. اهﻼ باقر .. كيفك يازول نعل مافي
عوجة؟ .. تلفونك ده ماطبيعي .. ان شاء الله كلو حاجة
تمام ..
قال ليهو اصحى يا مخلوق .. مافي عوجة شنو.. والله
العوجة بايتة ومقيلة .. اصحى شوية .. انا ماقادر اصبر
للصباح .. عشان احكيلك .. انت بتعرف هنادي طبعا؟ ..
قال ليهو ايوة النجارة ماﻻ؟
قال ليهو ياخي الزوله دي زي ماعارف .. قبل كدا الشباب
حكو عنها ..
وانا من اليوم داك .. بحنك فيها .. شي بالتلفونات ..
وشي مراسيل .. وشي لمن اﻻقيها في الشارع ..
واصلو حنكي ابا يمشي فيها .. وشكلها زولة ناسات ..
اها يازول المهم حركاتي معاها دي .. وصلت ﻻبوي ..
ماعارف بياتو طريقة . ابوي قام طلبها .. قال ليهم
عايزنها للباقر ..
وانا والله ماعايزها نهائي .. كمال قال ليهو ماﻻ يعني؟ ..
بس عشان كﻼم الناس ؟ انت شفت حاجة بي عينك؟
قادر تثبت حاجة؟ ..
.. شفتها ماشة مع زول؟ .. ﻻقيتها في حتة معاها واحد
من الشباب؟ ماشين سوا؟
قال ليهو ابدا والله ماحصل .. لكن بس ياهو الكﻼم
البقولو فيهو ده ..
قال ليهو ياخي عليك الله سيب الوسوسة وسوء الظن
.. كلها مجرد اتهامات وكﻼم باطل .. في ناس اصﻼ
بحبو يتهجمو على بنات الناس .. ويوسخو سمعتهن ..
قال ليهو ياخوي العود المافيهو شق ماقال طق .. وقالو
مافي دخان بدون نار .. انا الزولة دي حد الله بيني وبينها
..
قال ليهو يعني لو اي زول جا وعمل تأليف تهمة في
واحدة من اخواتك التومات ديل .. انت بتقول العود
المافيهو شق ماقال طق ؟
موش كدا ؟؟؟
ياخي اتق الله وماتتهم بنات الناس بدون بينة .. انا
راسي ده موجعني خليني اكمل نومي نوم ..
الباقر قال ليهو انت اصلك اهبل .. ومابتعرف البنات
ديل.. بعرفهن انا .. نوم لكن انا بعرف لي طريقة اتخارج
بيها منها ..
كمال قال ليهو ياباقر نصيحة مني ليك .. اتأكد قبل
ماتتصرف .. يﻼ مع السﻼمة ..
المشكلة انو باكر الصباح ادريس النجار مشى لي عمك
حاج عمر وقال ليهو البشارة ياحاج هنادي وافقت بالباقر
..
الى اللقاء فى الحلقة الرابعة.


 
 توقيع :



تعجز كل مفردات الشكر والإجلال للرائعة صاحبة الذوق العالي رؤى


رد مع اقتباس
قديم 15-03-2018, 01:43 PM   #4
الادارة



الصورة الرمزية يوسف مدير
يوسف مدير غير متصل

بيانات اضافيه [ + ]
 رقم العضوية : 11520
 تاريخ التسجيل :  Jul 2011
 أخر زيارة : اليوم (01:55 PM)
 المشاركات : 8,635 [ + ]
 التقييم :  5203
 الدولهـ
Sudan
 الجنس ~
Male
 SMS ~
1000
لوني المفضل : Blue
افتراضي



📚طارق اللبيب
صراحة مدعومة
الحلقة الرابعة
بقلم طارق اللبيب📚


طبعا وقت ادريس النجار ابو هنادي جاء لحاج عمر ..
وبشره بالخبر ده .. فرح فرح شديد خﻼص .. وقال ليهو
ياسﻼم يا ادريس والله انا من مشيت مني .. في كل
صﻼة بقول ربنا يقسمها لينا البت دي .. البت البتصارح
ابوها بكل كبيرة وصغيرة .. ابشر يازول .. انحن بنحدد
ليكم مواعيد ونجيكم في البيت ناس جد ..
بعد مافات ادريس . يادوب كدا حاج عمر ماشي يكلم
مرتو ام الحسين .. وبناتو اﻻتنين .. قال ليها تعالي
يابت السيد .. باقي قبال يومين انا طلبت هنادي بت
ادريس للباقر .. وهسي الجماعة ردو لي بالموافقة ..
قولي ان شاء الله ربنا يتم على خير ..
قالت ليهو انت يا الحاج مابتشاور . ؟ يعني نحن قاعدين
في البيت ده طراطير ؟ هسع انت شاورت الولد ؟ قال
ليها كلمتو .. واسمعي يابت السيد .. الموضوع اصﻼ جاء
بطريقة غريبة .. ماني داير احكيها ليك .. بعدين تعا
نقولك.. انتي ما واثقة في اختياري لولدي ؟
كدي اسألي بناتك ديل قولي ليهن رايكن شنو في البت
دي؟
في واحدة من التومات قاعدة جوة سمعت الكﻼم جات
طالعة .. قالت ليهو منو يابوي . موش هنادي اخت هدى
أدريس؟؟ قال ليها ايوة اها؟؟
قالت ليهو ديل بنات ممتازات شديد .. انا بعرف هدى
.. لكن بحب هنادي اكتر منها .. زولة عسل عديل ..كل
مرة بجي غاشياها من المدرسة .. بس عارف يابوي مرة
باقر اخوي.. لقاني واقفة معاها قال لي تاني الزولة دي ما
القاك معاها تاني.. اوعك تباري اﻻشكال دي ..
انا لحدي هسي مستغربة انو الباقر قال لي كدا ليه؟ مع
انها هنادي دي والله .. اكتر واحدة دغرية في الحلة دي
..
عشان كدا !!!!!ّّّّ مااعايزني اكشفو انو بحبها موش؟
يادوووب فهمتك يا فقري ..
عمك حاج عمر عاين لي مراتو كدي .. وقال ليها اها
اتفرجي شوفي بتك بتتكلم عنها كيف ..
انتي قايلة انا بقوم لي في موضوع ساي ؟
والله الباقر الكلب .. لقا ليهو مراة صالحة .. لو ماعارفة
اعرفي .. والله هو ذاتو مابستحقها لكن الله غالب ..
ولو لقاها صرتو ﻻغرتو .. ‏( يعني حظو ‏)
اليوم ده كلو حاج عمر فرحان يمرق ويدخل .. والله
التقول هنادي دي داير يعرسها هو براهو ..
زي ماقالو اهلنا .. الراجل مابتمنى لزول يكون احسن منه
اﻻ ولده ..
دايما ولدك هو البتتمناهو يتفوق عليك ..
وبقى متحضر .. لمتين يجي الولد اﻻسمو الباقر ده ..
ويبشره بموافقة البت ..
المهم حسين الكبير قام جاء قبل الباقر ..
حسين شغال في سوق ام درمان عنده محل بتاع اقمشة
.. والباقر موظف في الكهرباء . اﻻتنين شغالي كويس
ماعندهم عوجة ..
الحاج قال لي ولده الكبير .. تعال يا حسين النحكي ليك
المستجدات .. انت ﻻزم تكون اول زول يعرف وتدينا
رايك ..
. قال ليهو في شنو يا ابوي بشر ان شا الله خير ؟
حكى ليهو الحاصل بدون حكاية المعاكسة حقة اخوهو
..
بس قال ليهو .. عمك ادريس جاني هنا .. واتكلمنا عن
بتو اﻻسمها هنادي وانا طلبتها منو لي اخوك ..
قال ليهو والله مافي عوجة لكن .. نحن ناسينا ياحاج وﻻ
شنو؟
هسع الناس يقولو فيني شنو .. اكان خطبت ﻻخوي
الصغير.. وانا قاعد اطوطح كدي ..
ابوهو قال ليه اسمع يا حسين .. انا مابخليهو يعمل اي
خطوة .. قبل ما انت تعرف البيك من العليك ..
حسين قال ليهو لكن والله يا ابوي هنادي مافيها كلمة
علي القسم البت دي متكيف منها ﻻمن مالية راسي ..
والباقر يستاهﻼ ..
قال ليهو والله مايستاهﻼ .. والله هي اخير منه ..
يصرمح ويتحاوم الليل كلو ..
بس يازول مافي كتير كدي الباقر جاء داخل ..
ابوهو قال ليهو ادخل غير هدومك دي وتعال نحن
دايرنك ..
قال ليهو جدا يا ابوي ..
عمك حاج عمر زول صعب .. واوﻻده بعملو ليهو الف
حساب .. ياخي خلي اوﻻده .. ناس الحلة كلهم بعملو
ليهو الف حساب .. وكلمتو بتمشي فوق اتخن دقن ..
الباقر جا ومطير عيونو .. وحاسي بانو الموضوع بقى جد
..
حسين عاين ليهو كدي وبسم .. وقال ليهو مبروك يا
باشا.. مابتكلمني ياخي ؟
قال ليهو في شنو؟ هو في شنو بالضبط كدا ياجماعة؟؟
فهموني ..
حسين قعد يعاين ﻻبوهو ..
ابوهو قال ليهو يعني يا الباقر عامل زي الكانك ماعارف
..
اسمع يا زول عمك ادريس جانا هنا على حسب طلبي
.. وقال البت وافقت .. وانا هسي دايرك تحدد يوم
عشان نمشي نطلب منهم رسمي ..
قال ليهو يا ابوي انا لسع ما اديتك راي .. يعني
الموضوع ده ماشي علي بالعافية كدا وﻻشنو؟
قال ليهو ايوة بالعافية .. اول انت وكت بتتكلم معاها
في الشارع .. وبتراسﻼ بالتلفون .. قايل بنات الناس
لعبة . ؟
علي الطﻼق ياكلب .. تقول كلمة جاي وﻻ جاي .. اﻻ
اكسر ليك راسك ده ..
انت قايل خﻼص كبرت ومافي زول بوقفك عند حدك؟
انا اديت الراجل كلمة .. ومابكسر كلمتي .. شوف
المواعيد وكلمني ماتكتر معاي الكﻼم ..
حسين قال في شنو يا ابوي؟؟ .. انا شكلي ماعارف
خلفيات الموضوع ..
الباقر قال ليهو انا بحكي ليك ياحسين .. وبعدين شوف
انت ذاتك رايك شنو؟
قال ليهو جدا قام الباقر مشى ..
وابوهو طلع .. حسين لحق الباقر .. قال ليهو اصبر ..
دقيقة انا عايزك تعال لي بي غادي ..
دخلو الصالون بتاع الضيوف .. وبقى حسين اخوهو الكبير
يسأل فيهو ..
قال ليهو اوﻻ .. انت يعني البت ماعايزها ؟
قال ليهو ايوة ماعايزها لو بقت اخر واحدة .. حتي لو
عزيت حلف ابوي .. واتزوجنها بطلقها طوالي بعد شهر ..
قال ليهو ماﻻ؟ عيبها لي .. بت ماشاء الله جمال وقوام
وادب واحترام .. ومافيها كلمة ..
الباقر ضحك .. وقال ليهو انت مافاهم اي حاجة وزول
داقس بس ..
البت دي ضاربة .. ومابتنفع مراة بيت ..
الحاصل ياخينا .. انو البت دي سمعتها زي الطين .. وانا
كنت براسلها بالتلفون .. وكدا ..
والوكت كله عاملة تقيلة .. وابت تديني وش ..
قامت كلمت ابوها .. ابوها شكاني ﻻبوي .. ابوي طلبها
طوالي ..
حسين قال ليهو طيب ياخي .. لو البت دي فيها اي
كلمة زي ما انت بتقول ..
موش كانت اتجاوبت معاك؟؟ .. اوعلى اﻻقل كانت
سكتت .. لكن كونها تحكي ﻻبوها .. معناها دي بت
دهب ..
قال ليهو دي حركات بنات .. انت عارف هسي البنات
البعملن كدا
عايزات ينضفن سمعتن . لكن هنوده نحن عارفنها ..
حسين قال ليهو عارف ليها شنو؟ .. قال ليهو ياخي كم
واحد من الشباب بحكو عنها .. وعن خفتها وحركاتها
وعﻼقاتها .. بس علي انا عاملة لي تقيلة .. عشان تنفذ
الخطة دي .. لكن دي مابتمشي علي انا ..
حسين قال ليهو والله مادام انت في راسك في موضوع
.. المفروض تحكيهو ﻻبوك .. وابوك ما ممكن يزوجك
انسانة زي دي .. خليك صريح الصراحة دايما مدعومة ..
قال ليهو اصبر .. انا مابحكي ﻻبوي اي حاجة .. بس انا
براي بخليها تغير رايها مني وتقول مادايراني ..
الى اللقاء فى الحلقة الخامسة.


 
 توقيع :



تعجز كل مفردات الشكر والإجلال للرائعة صاحبة الذوق العالي رؤى


رد مع اقتباس
قديم 18-03-2018, 02:37 PM   #5
الادارة



الصورة الرمزية يوسف مدير
يوسف مدير غير متصل

بيانات اضافيه [ + ]
 رقم العضوية : 11520
 تاريخ التسجيل :  Jul 2011
 أخر زيارة : اليوم (01:55 PM)
 المشاركات : 8,635 [ + ]
 التقييم :  5203
 الدولهـ
Sudan
 الجنس ~
Male
 SMS ~
1000
لوني المفضل : Blue
افتراضي



صراحة مدعومة
الحلقة 5
بقلم طارق اللبيب ..
طبعا الباقر من يومو العرف .. انو الكلام وصل لابوهو..
وقف من هنادي الرسايل .. وبقى تاني مابمر بالشارع الفيهو بيت ناس ادريس ..
وهنادي مستغربة .. ليه الزول ده وقف منها الرسائل؟ .. لكن قالت خلاص .. هو معناها عرف انو انا موافقه.. فما اظن في داعي داعي للمراسلة والحاجات دي .. يعني الزول كان بستجدى الرضاء والقبول .. والرضا والقبول تم .. غايتو المهم انو هنادي ماخاتة في راسها انو الباقر قصدو ملي فراغ .. وما كان جادي اصلا..
المهم بقت مشغولة بيهو..
اليوم كلو وبتتخيل في الباقر بتكلم .. وبتتخيل فيهو ماشي .. وصراحة الزولة دي اشتاقت لرسالة منو واحدة.. زي رسايل زمان ..
وندمت انها كانت بتمسح الرسايل .. على الاقل كانت ترجع ليهن في الوقت ده.. عشان شوية يخففو عليها الوحشة دي ..
اها يازول لمن خلاص غلبها الصبر وفاض بيها .. رسلت ليهو هي رسالة ..
مساء الخير ي الباقر .. كيفك ؟؟
وقرا الرسالة وصننننن .. صبت فوقو مطرة هه ..عمل نايم وابا يرد ..
باكر الصباح رسلت ليهو تاني ..
الباقر صباح النور .. امبارح شكلك ماقريت الرسالة ..
وصننننن ... برضو ابا يرد .
قالت انا تاني مابرسل ليهو .. الا يرجع لي براهو .. عان الود الفرحان ده عليك الله .. الزمن كلو ساكيني بالرسايل .. عايزني ارد ليهو.. لمن اتجاوبت معاهو ..وبقيت اتساهل معاهو ..عايز يعمل فيها مهم .. هه
والله غايتو الرجال ديل عندهم جنس حركات .. تحير ..
وفعلا قطعت الرسايل منه ومغيوظة .. وهو طبعا" مولعة فيهو نار .. عايز يخلص من الكابوس ده .. وماعارف يعمل شنو .
يوم مشى لواحد من اصحابو الكانو بتكلو عن هنادي.. اسمو (احمد قرع) .. يتخيل لي قرع ده لقب ..
طبعا اصلا الباقر المسائية كلها حايم مع اصحابو .. شي النادي وشي في الميدان بتونسو.. وشي جنب فضل بتاع الفتة ..
اليوم داك ضرب لي احمد قرع.. قال ليهو دايرين نتعشى انا وانت تعال لي .. احمد زول بتاع شمارات.. وكلامو كتير.. وماجادي وعندو اللا مبالاة ..وعاطل طول اليوم حايم بالضلله .. وقدام الدكاكين .. والحلة دي حايمها شارع شارع ..
وكل يوم تلقاهو في مزاج مختلف.. ولبسة مختلفة ..
وجايب اخبار بنات الشرق والغرب ..وتلفونو مليان ارقام بنات .. وحسابو في الفيس فيهو خمس اولاد والباقي بنات صرررر ..يعني بالاختصار زول صايع والصياعة مكملا تب ..
اتلاقو الباقر واحمد قرع عن فضل .. فضل فاتح في الزلط ومحلو منور .. وعندو بنابر وطرابيز .. انت بتمشي تطلب الفتة وبتجي تقعد بزبطو ليك بالدور .. مرات صحنك نص ساعة مايجيك .. ناسو كتيرين ..
الباقر طلب الفتة وشال بنبرين وطربيزة .. وابعد من الناس شوية
وقعد.. وقال لاحمد اتفضل اقعد ..نتونس يادوب ماجات الفتة ..
قعدو .. الباقر قال ليهو يا قرع ياخي عندي ليك سؤال محيرني ..
انت زول تفتيحة .. وشارب الحلة دي شراب .. وعارف الحاصل فيها ..
ياخي رايك في هنادي بت النجار شنو ؟
احمد قال ليهو يااااه .. والله دي قيامة عديل ياخي . الباقر قال ليهو قيامة تقوم لك فوق راسك ده.. انا مابٍسألك من قيامتها ..
قال ليهو طيب بتسأل عن شنو انت يا شاطر ؟
قال ليهو طيب .. انا الزولة دي بحاول معاها .. يمكن تلات شهور عشان تديني كلمة طيبة .. ما راضية تتجاوب معاي .. وانا سمعت انها بتاعات ناسات وكدا .. لكن ماعندها مشكلة صح؟؟
قال ليهو ايوة .. الزولة دي ماعندها مشكلة صدقني ..بس انت بتكون ماعرفت ليها .. معروفة ياخي . بتتكلم مع ياسر وصابر ومحمد ود رقية ..وكلهم بحكو عنها ..عندها مغامرات كتيرة معروفة يازول .. بس انت زول حنكك بيش..
قال ليهو وانت يا احمد ماعندك معاها شي ؟
قال ليهو ابدا انا ماعندها معاي علاقة .. علاقتها مع المرطبين ديك .. قال ليهو طيب طبيعة العلاقة شنو؟ مثلا يعني رسايل ولا لقاءات ولا شنو؟
قال ليهو والله كلو ..قلت ليك هنادي ماااعندها مشكلة في اي حاجة صدقني ..
قال ليهو طيب .. انا عايزك تجيب لي رسايل من تلفون اي زول من الشباب ديل .. تثبت لي الموضوع ده ..
قال ليهو يعني اجيبها ليك كيف ؟ وبعدين منو البديني تلفونو.. عشان اوريك رسايلو معاها .. وتعمل لينا مشكلة بعدين.. انت انا عارفك بتاع قوائل ..
قال ليك بس لحظة.. انا بوريك تعمل شنو .. انا بعد أوريك رقمها
انت مثلا تشيل تلفون ياسر .. وتفتح مكان الرسائل او الواتساب . وافتح رسايلها معاو ..
واعمل تصوير للشاشة .. ورسلا لي ..وانا والله مابعمل ليك اي مشكلة ..
ياخي بتكون حليتني من مشكلة ..
قال ليهو مشكلة شنو يا ابو الباء؟؟ ..
قال ليهو باختصار يابوحميد ..احكي الحقيقة ..
انا ناس البيت عايزين يزربقوني في الزولة دي .. وانا عايز اوريهم اثبات .. على انها ما نافعة ..
انت كدا بتكون خدمتني ومرقتني من الورطة دي ..
قال ليهو طيب ياخي.. انت بدل اللفة الطويلة دي والفضايح.. ماتقول ليهم انا ماعايزها وخلاص ..
قال ليهو لاالا.. انت ماعارف الحاج متعصب ليها كيف ..
قال ليهو جدا انا بحاول اعمل الحكاية دي.. لكن مابضمن ليك .. اقدر ولالا..
جابو الفتة وبقو ياكلو ..
والباقر سكت مسافة بياكل .. وتاني فتح خشمو عن الموضوع نفسو..
قال ليهو لكن انت يا احمد متأكد انها الزولة دي كدا يعني؟؟؟ ..
قال ليهو والله .. انا سامع الشباب ديل .. بحكو طوالي عنها .. اكتر من البنات المشهورات بالعلاقات ..
احتمال لانها بتاعة ناسات ولاشنو؟
قال ليهو احتمال .. المهم بعد كلام احمد قرع .. الباقر اتأكد تمام التاكيد انو البت دي ما بتنفع ليهو كزوجة ..
بعد ما خلاص اتوادعو ..
الباقر قال ليهو يا احمد .. خلاص مافي داعي لقصة الرسايل دي .. انسى انا بتصرف .. ومشو ..
بالليل داك الباقر مشى رسل رسالة .. لي هنادي ..طواالي ..
السلام عليكم هنادي ..
هنادي انا اسف على الكلام الح أقولو ليك ده .. وارجو انو يكون سر بيني وبينك .. انا لمن كنت برسل ليك.. وكنت متمني تتواصلي معاي .. كنت طالع من صدمة .. كان عندي زولة بحبها شديد .. حصلت ظروف وخلينا بعض .. وانا كنت بتواصل معاك واتمنيت انك .. تقيفي معاي وتخففي علي .. لكن للاسف كنت عنيدة وكسرتي قلبي .. اها يا هنادي هسي الحمد لله الزولة رجعت لي وتمه مناي .. فارجوك منك رجااااء .. تاني ماتراسليني .. لانو مابرضى حبيبتي تشوف رسايلك .. وانا اسف مرة تانية ..
الى اللقاء ..


 
 توقيع :



تعجز كل مفردات الشكر والإجلال للرائعة صاحبة الذوق العالي رؤى


رد مع اقتباس
قديم 18-03-2018, 02:38 PM   #6
الادارة



الصورة الرمزية يوسف مدير
يوسف مدير غير متصل

بيانات اضافيه [ + ]
 رقم العضوية : 11520
 تاريخ التسجيل :  Jul 2011
 أخر زيارة : اليوم (01:55 PM)
 المشاركات : 8,635 [ + ]
 التقييم :  5203
 الدولهـ
Sudan
 الجنس ~
Male
 SMS ~
1000
لوني المفضل : Blue
افتراضي



صراحة مدعومة
الحلقة 6
بقلم طارق اللبيب
هنادي لمن قرت الرسالة عيونا كبتن .. والدنيا ضلمت في وشها وحست زي الكأنها فصلت كهربا .. قالت يعني انا اول مرة اتجاوب مع واحد .. واحس تجاهو بي حاجة .. وخلاص خدعت نفسي اني اخيرا ح يكون عندي بيت .. واكون سعيدة مع انسان ممتاز ..
يجي الباقر يصدمني صدمة زي دي .. معقول الباقر كان عاملني تسلية .. ولعبة .. يعني عاملني بدل فاقد .. خلاص بس لمن رجعت ليهو زولتو .. جدعني في اول شارع؟ .. ياحليلك ياهنادي بت منى.. وربرب ربرب .. رمت ليها دمعات كدا زي موية السخان .. وحست بوجع غريب اول مرة تحسو ..
اليوم داك هنادي ماقدرت تنوم بالليل.. وهي مستغربة في نفسها ..
ليه انا مـالمة كدا ياربي ..
لكن لانها للاسف ماعارفة الباقر ونيتو السيئة .. حاسة انها خسرت خسارة كبيرة ..
على كل حال .. بقت تفكر .. وتقول ياربي اوري ابوي الرسالة دي؟ طيب ابوي ح يتصرف كيف ؟ بالتاكيد حينهار . ح يزعل . ممكن يرتكب جريمة في الولد ده .. لانو ح يحس بالحقارة ..
انا ماعارفة اعمل شنو؟ اقول لابوي ماعايزاهو وبس ؟ طيب انا واقفت.. وابوي فرح .. وكلم حاج عمر ..
المهم الصباح بدري.. اتصلت علي شروق.. قالت ليها عليك الله ياشوشو عايزاك تجيني سريع .. قالت ليها جيايك هوا .. اصلا انا فاضية ..
جاتها .. هنادي حكت ليها كل الحصل.. وقالت ليها انا ماعارفة اعمل شنو؟
قالت ليها انتي المفروض من البداية تتأكدي من شعورو ناحيتك.. شكلو شنو؟ حتن بعد داك تدي موافقتك .. لكن انتي مامستعجلة يعملو ليك شنو؟
بعدين ياهنادي ..اوعك توري الرسالة دي لابوك .. بزعل شديد.. وبعدين يقوم يعمل مشكلة .. وانتي تكوني السبب .. وما حتسامحي نفسك بعدين ..
قالت ليها طيب اقول ليهم رافضة ليه ؟؟ ووافقت في البداية ليه؟ ..
شروق قالت ليها بس انتي قولي ماعايزاهو .. وهنادي شايفة الكلام ده كدا ما منطقي .. وابوها اكتر حاجة بزعل منها .. انو بتو تدس عليهو حاجة .. المهم مالقت راحة في مشورة شروق ..
وشروق ادتها الفي راسها وفاتت منها وقالت ليها البحصل عليك كلميني بيهو ..
هنادي اتوكلت علي الله.. وقررت تحكي لابوها وتصارحه بالموضوع ..
وقلبها كان بضرب شديد .. ومتوترة وجسمها بارد زي التلج .. ماعارفة ردة فعلو ح تكون شنو لمن هي تكلمي بالمصيب دي ؟
ابوها كان مافي لمن جا .. قال جيبو لي الفطور .. هنادي عملت ليهو الفطور جابتو ليهو .. وختت الصينية قدامو وقالت ليه براااحة كدا : يا ابوي.. انا عايزاك في كلام سري .. امي ماتعرف كويس؟؟.. قال ليها جدا بعد افطر تعالي لي بي غادي .نقفل باب المعرض من برة ومن جوة ..ونشغل المروحة وتحكي لمن تزهجي ..
المهم جات قعدت ومتوترة .. قال ليها في شنو يابت؟ .. قالت ليهو والله خايفة من ردة فعلك على الكلام البقولو ليك ده .. ولازم اقولو ليك .. لانك انت صاحبي الوحيد.. البحكي ليهو كل شي.. وفي نفس الوقت بخاف عليك .. من المشاكل ..
قال ليها احكي كل العندك ..أفو انا ابوك انتي ياست البنات .. انا جبل .. قولي بس .. والله ما اخيبك .. ولا تلقيني رجاف ..
قالت ليهو طبعا بعد انا وافقت على الباقر.. وكلمتكم.. وانت بدورك .كلمت ابوهو.. والموضوع بقى جدي ..
انا حاولت اتواصل مع الباقر .. ورديت على رسالته الاخيرة .. هاك اقرا .. ردي .. وفتحت ليهو الرسايل .. قالت ليهو ..
وتاني مارسل لي .. قمت انا رسلت ليهو الرسالة دي .. مارد علي .. تاني رسلت ليهو دي.. مارد علي .. وفاتحة ليهو التلفون وهو بقرا في الرسايل ..
اها في النهاية يابوي.. امبارح بالليل.. رسل لي الرسالة دي.. هاك اقراها كويس .. وشوف الكلام بي رواقة.. وريني رايك شنو؟ والحاصل شنو؟ وانا اتصرف كيف؟ ..
ادريس قرا الرسالة.. بتاعة الباقر الاخيرة .. وبقى يرجف وعرق عرق .. والمروحة شغالة في اعلى نمرة ..
قالت ليهو انا يا ابوي ده الخايفة منو .. ولايهمك .. الحمد لله عرفنا انو الزول ده ما بنفع .. من هسي قبل مانتورط .. بس لانه قال لي الكلام ده سري.. ماتحكي لابوهو اي حاجة من الموضوع .. بس انا طالبة منك تنهي الموضوع ده.. بكل هدوء وخلاص ..
قال ليها حاضر .. انتي شايفة كدا؟؟؟ قالت ليهو نعم .. بس عشان خاطري .. اعمل زي مابقول ليك حبيبي ..
قال ليها حاااضر ابشري ..
علي الطلاق ده مشوار مني مايستحقه .. وانهي ليك الموضوع بالتلفون ,, طلع التلفون من جيبو .. وطلع رقم حاج عمر
واتصل عليهو .. الو السلام عليكم ياحاج عمر ..
والله ياحاج عمر النسب معاك شي يفرح الانسان .. ويخلي الزول يحس بالشرف ..
لكن والله بس بتي عنيدة وراسها قوي .. بعد ما وافقت وفرحنا .. هسي غيرت رايها .. وقالت ما عايزة الموضوع كلو كلو .. قدر كا حنسناها ..
فيا حاج عمر ياخي ان شاء الباقر ربنا يقسم ليهو اخير منها ..
وانا هسع حبيت اخبرك واتأسف ليك .. لانو ماحصلت قسمة ..
الراجل بعد انتهى من المكالمة.. حاج عمر سكت قريب نص دقيقة .. وشال نقسو وختاهو ..وقال ليهو يازول مافي عوجة .. والله كان مناي في الدنيا .. بتك تبقى في بيتي .. لكن كل شي بيد الله .. مع السلامة ..
هنادي اتنفست الصعداء .. وقالت ليهو الله يخليك لي يا ابوي.. والله انا من غيرك ما كنت عارفة اتصرف كيف .. واعمل شنو ..
قال ليها والله انا هسي زعلان زعلة يا بتي.. دمي ده يغلى .. شوفي الولد الكلب ده بالله .. يعني شايفك انتي رخيصة .. لمن جات للعرس فضل واحدة غيرك .. شكيناهو لي الله وبس .
قالت ليهو يا ابوي الله مابضيع عنده حق .. خلاص انسى ..قوم افتح الباب .. هسي امي لو حست بي قعدتنا دي.. الشمار بحرقها.. وقعدت تضحك .. عاين ليها كدا.. وقال ليها غايتو انتي.. سعيد البقع فيك والله ..
اها يازوووول ,, اتاريها الحلة كلها سمعت بانو الباقر عايز هنادي
والخبر انتشر انتشار النار في الهشيم ..
والخبر نشرته ام الباقر .. لانها كانت فرحانة دي اول سيرة عرس تتفتح في بيتها .. واي مراة تقول ليها والله هنادي دي بت نادرة في الحلة يعني ..
اها لمن حاج عمر جاء كلم زوجته قال ليها البت رفضت الموضوع
وابوها اتصل قال مافي قسمة .. المراة انصدمت بالخبر صدمة شديدة ..
ولمن جا الباقر وابوهو كلمه قال ليهو البت رفضت الموضوع .. قال ليهو (احسن الحمد لله) ..
قال ليهو ياود انت مشكلتك شنو؟ قال ليهو ماعايز عرس.. انا يا ابوي ..
قال ليهو جدا ان شاء الله ماتعرس ..لكن والله تاني زول يشكي منك بتعاكس بتو الا اتكيك واضبحك .. كلب ..
اها لمن امو سألته .. قالت ليهو كيف انت بتقول لابوك احسن البت رفضت ..
قال ليها يا امي البت دي سمعتها في الحلة مانضيفة .
قالت ليهو والله كذاب وستين كذاب .. والله البت زيها مافي انا سألت منها وكلموني .. بس انت زول فقري وماعندك حظ .. عشان كدا ربنا ماقسمها ليك ..
قال ليها دي حاجة بعرفوها الشباب مابتعرفنها انتن الحريم .. كدي يا امي خليني من الموضوع ده .. انا عندي نية سفر .. عايز اعمل اجراءات .. مسافر السعودية ..
قالت ليهو السعودية تسعد فيها شنو؟ هو الناس يهديل جايين منها انت ماشيلا؟
امشي علي ابوك كلمو ماتكلمني انا ..
المهم بنرجع للباقر ونشوف خبره ..
اها يازول في مرة بتاعة شمارات .الفولة ماببتلا في خشمها .. اسمها العازة .. جات بتصأل في ام الباقر .. قالت ليها ان شاء الله الباقر ربنا يتم ليهو علي خير .. قالت ليها خير شنو؟ .. الولد ابا البت وقال مو دايرا .. ..
قالت ليها اباها مالا قال ..؟؟؟
.. قالت ليها والله مابعرف ..لكن قال البت مامشكورة (طعن الشرف).. العازة شالت الخبر وقامت بالحلة .. وتعال شوف ..
الى اللقاء ..


 
 توقيع :



تعجز كل مفردات الشكر والإجلال للرائعة صاحبة الذوق العالي رؤى


رد مع اقتباس
قديم 20-03-2018, 04:48 PM   #7
الادارة



الصورة الرمزية يوسف مدير
يوسف مدير غير متصل

بيانات اضافيه [ + ]
 رقم العضوية : 11520
 تاريخ التسجيل :  Jul 2011
 أخر زيارة : اليوم (01:55 PM)
 المشاركات : 8,635 [ + ]
 التقييم :  5203
 الدولهـ
Sudan
 الجنس ~
Male
 SMS ~
1000
لوني المفضل : Blue
افتراضي



صراحة مدعومة
الحلقة 7
بقلم طارق اللبيب
طبعا العازة مشت والشمار حارقها .. وماقادرة تصبر للصباح .. ضربت تلفون لصاحبتها.. اسمها سمية .. قالت ليها باكر انتي جاية ناس السرة؟ قالت لي اي جاية ..
ناس السرة ديل عندهم قعدة جبنة بالنهار.. يوم الاحد والاربعاء بتلملمن الحريم.. المتعوسة على خايبة الرجاء .. ومابخلن خبر في الحلة .. الطلقوها والعرسوها والراجلا مشاكلها.. واخبار القوالات والمشاكل ..
سمية قالت ليها جاية في شنو؟ العازة قالت ليها في خبر كدي مالي الحلة ..
سمعتي بي طلب حاج عمر لي هنادي بت منى؟
قالت ليها اي ماشاء الله.. قالو ادوها ليهو.. والبت وافقت ..
قالت ليها ماسمعتي بالمستجدات .. قالو ياختي الولد مشى سأل من البت .. ولقاها........ استغفر الله العظيم ..
قالت ليها هوي يا العازة .. انتي بتتكلمي عن منو؟ هنادي ؟
قالت ليها اي ياها هنادي.. المنافقة.. البسمعها تتكلم .. وتحذر في الناس من الغلط والعيب .. وعاملة فيها امنة بنت خويلد .. سمية ضحكت عليها .. قالت ليها يا العازة ماتلخبطي .. امنة بنت وهب براها.. وخديجة بنت خوبلد براها ..
قالت ليها ماخلاص المهم.. كلهن صحابيات .. البت عاملة فيها صحابية ..سمية قالت ليها ديل ماصحابيات .. واحدة ام الرسول والتانية زوجته..
لكن ماقلتي لي الكلام جابو من وين هو؟؟ ..
احتمال حقد وحسد من البنات .. اصلو قالو الفتوات ديل .. لمن يسمعن بي خبر عرس النار بتولع فيهن .. خاصة لو عرس واحدة من نديداتهن..
قالت ليها والله عاد مابعرف.. المهم الخبر مطلوق .. قالت ليها انتي سمعتي بيهو من منو؟
قالت ليها يابت انا قالت لي امو ذاااتها.. الولد كلم امو.. وامو كلمتني ..
قالت ليها خلاص كدي لي بكرة .. ياخبر النهارده بفلوس.. بكرة يبقى بلاش ..
سمية في ليلا داك .. سألت راجلا ..قالت ليهو انت بتعرف الباقر ود حاج عمر؟ قال ليها ايوة بعرفو مالو ؟
قالت ليهو طبعا قالو خطب هنادي بت ادريس .. ولمن سأل منها.. الناس اتكلمو فيها كلام ماكويس..
قال ليها هنادي؟؟ سبحان الله .. لو هنادي ما كويسة .. تاني الكويس منو في الدنيا دي؟ .. والله هنادي نحن شاكين في انوثتها .. شدة ما دوغرية .والكلام ده من هي طالبة .. بت توزن رجال ..
امشي عليك الله شوفي ليك نوم نوميهو ..
الزول لو ما داير البت.. كان يقول مادايرها وبس ..بدل الناس تقعد تألف وتكذب في بنات الناس واعراضهم ..
قالت ليهو عاد كان مافي كلام .. الناس مصلحتها شنو.. يتكلمو فيها ؟؟ معناها في كلام .. ومافي دخان بدون نار ..
قال ليها يدخن راسك ده .. ماعندك شغلة غير اتهام الناس.. والظنون .. الله يقطعك .. والله تاني اسمعك جبت ليك سيرة زول ماتقعدي معاي يوم واحد ..
الراجل ده اسمو اسامة ود حمد .. الزول ده ودخالة كمال صاحب الباقر .. الاتكلم معاهو المرة الفاتت وصحاهو من اليوم عشان يسأله . من الموضوع ده ذاااته ..
الواطة ما اصبحت كويس.. والناس مشو على الاشغال .. النسوان اتلمن في في بيت ناس السرة بعد الفطور .. والعازة بدت في بث الاخبار .. بالوسوسه والاسرار . . واي مرة تكلمها تقول ليها ده كلام سر.. اوعه تفتحي خشمك ده .. طبعا العازة من الناس العندهم مرض السبق الصحفي .. ماعايزة زول يجيب الخبر قبليها.. ودي مرضة عويصة نسأل الله العافيه ..
المهم الخبر ملأ الاذان .. واستقر في قلوب الاغبياء الذين يصدقون كل مايسمعون ..
في الوكت دا .. كانت هناي شغالة بتركب في طرابيز موسكي في الورشة بتاعة ابوها .. وبتضرب فيهن بونيش .. وما جايبة خبر للبتنسج بي وراها في شرفها ..
وابوها قاعد برة في المعرض.. وهي جوة شغالة.. وبتهظر معاهو .. قالت يا ابوي .. انت امى دي.. الليلة من الصباح بتغني .. في غنية خاتمي الجنن البنوت مالا ؟ الا رايحة منها حاجة ..
قال ليها يكون رايح منها مشط .. اصلا مافي حاجة بتروح منها.. امك دي حاجة حريصة .. دي لو راحت منها حاجة مهمة مابتغني كدا .. بتقلب البيت نواحة وسكلي .. خليها تغني .. ياخي تفرق على روحها .. والله عايشة جوها تمام ..
طيب نرجع لي ناس القهوة .. وقعدة النسوان الشيطانية .. طبعا القعدة دي اصلا .. طقوس بتاعة ظار وهوس.. ومرات بفتحن فيها العلبة .. ولو جات الشيخة حليمة .. تمت الناقصة لانها بتتلبش وبتكشف ليهن المخفي هه
والبخور ده طاقي لامن مارق بالشبابيك .. والفشار والتمر والكرشة
ام فتفت بـ العتي .. غايتو داخلات في مزاج عالي .. وابليس مستحوذ عليهن والعياذ بالله ..
من النسوان القاعدات هنا ديل .. واحدة اسمها شادية النور .. اخت ليلى النور ام شروق .. وسمعت الخبر طاشي في القعدة ..جايباهو العازة .. وكانت عارفة انو شروق.. صاحبة هنادي المقربة ..
ضربت لشروق تلفون.. قالت ليها تعالي سريع .. عشان تسمعي باضانك ..
انا كان كلمتك مابصدقيني .. قالت ليها في شنو ياخالتي ؟
قالت ليها قلت ليك تعالي عند ناس السرة هسي خلي اي حاجة .. وتعالي .. ليلى امك في؟
قالت ليها امي شغالة .. بتقشر ليها في بطاطس دايرة تسوي ملاح الغدا .. قالت ليها خلاص خليها تعالي انتي .. شروق جات لافحها الهوا من الاستعجال .. لانها بتحب الشمار زي عيونها .. قالت ليها اقعدي .. الكلام في صحبتك العزيزة الساكنة عندها دي .. قالت ليها منو دي ؟؟ قالت ليها هنادي بت منى ..
قالن الخطيب خلاها عشان ماكويسة .. الكلام جابتو العازة .. من ام الحسين بت السيد .. (والدة الباقر) .وهسع النسوان كلهن بلوكن في الكلام ده ليهن ساعتين ..
شروق قع قع قع فقعهتها ضحكة بصوت عالي .. وصفقت ايديها ..وقالت ليهن هوي يانسوان .. والله انتن كدا بعد دا ربنا حينتقم منكن. بالجد .. كملتن اخبار الرجال الصعاليق.. والاولاد العينهم طايرة .. بقيتو الليلة على هنادي .. هنادي والله.. انا بتمنى في كل يوم.. اني اكون زيها ..
هنادي والله اشرف واحدة في الحلة دي .. انتن البتتكلمن ديل اسكتن ساي ..ماتخلني افتكن واحدي واحدي ..وافت بناتكن .. وافت ليكم رجالكم .. يا ماعندكن شغلة ..
وحات الله .. هنادي قبلت بي الباقر.. بعد تعب.. لانو زول تافه وحقير .. وكان زمن براسلها .. وساكيها نفسو مقطوع ..عايزها تتكلم معاهو وتجاوبو.. وهي طبعا حبيبتي بتكلم ابوها بكل شي.. وبتدي ابوها التلفون يقرا رسايل الولد ..
لمن نحن اقنعناها ..انا وامها ابوها اصرو على الباقر قبلت بيهو .. لمن قبلت بيهو .. زاغ وقطع رسايلو الكلب الوسخ .. يجي يكذب فيها ؟؟
هييييييي وتاني هيييييي.. هنادي الابهه ..وما فيكن البتشبها ..
هنادي شرف القبيلة .. العفيفة واصيلة..
وشروق زعلانة لامن تزبد وتصفق في يديها والنسوان ديل صابة فوقن مطرة ..
قالت ليهن انا والله هسي امشي اجيب تلفون هنادي .. واديكن تقرن الرسايل البرسلها ليها الولد ده .. وتشوفن هي بترد عليهو ولاالا .. لو لقيتنها عبرتو .يبقى كلامكن صح .. بعدين انتي يا العازة بتك ميادة وين؟ هسي بتك عارفاها وين؟ لمن تجي تتكلمي في بنات الناس ؟؟..
لو عايزة تعرفي عن بتك.. بوريك انا.. ولا احسن اسكت.. مافي داعي للفضايح .. انا احي ياقلبي ..
بس قولن ان شاء الله الكلام ده مايصل هنادي .. ومايصل عمو ادريس .. لانو والله ح يحرق الحلة دي بكبريتة .. ده انا بعرفو كويس وشفت ليهو كم موقف .. بس خلي الخبر يصل ليهو .. وحياة ربنا .تاني الباقر ده الا تفتشو ليهو شاهد قبر .للمقابر لانو مابحيا تاني ..
خالتها شادية قامت عليها قالت ليها شروق حبيبتي اهدي.. انتي هسي مالك هايجة كدي؟؟
انت في زول قال عنك حاجة؟؟ .. شروق عاينت لي خالتها كدا باحتقار .. وقالت ليها يعني الا يتكلمو فيني انا؟؟ .. انا والله هنادي عندي اهم من نفسي.. لو ماعارفة اعرفي ..
يلا والله شوفتكن ذاتها مابتشرف .. الغريبة قالو مايقع في العرض الا مهتوك العرض ..
صدق القال المثل ده .. وضحكت ومشت ..
اول من طلعت شروق.. العازة قالت عايني البت زعلانة كيف؟؟ .. عشان صاحبتها .. لانو الكلام في صاحبتها .. معناها هي ذاتها ح يقولو زيها ..
هسي لو دي واحدة تاني غير هنادي .. ماكانت هاجت كدي ..
والله زعلتها دي بتأكد انو صاحبتها دي فعلا مااااااا مشكورة .. قامت عليها شادية .. قالت ليها هوي يا العازة.. انا سكت ليك كتير .. شروق هسي ماكانت قاعدة.. مالك مافتحتي خشمك؟؟ .. لمن فاتت حتن قعدتي تتفاصحي؟؟ .. اناديها ليك تقولي كلامك ده قدامها؟
قالت ليها هوي ياشادية انا ما فاضية لي مشاكلكن وردحيكن ده .. عليك الله خلاص انا ماشة .. وانا مصلحتي شنو في هنادي ولاغيرا .. القعدة اتفرتكت والنسوان فاتن وشايلات الخبر في خشومن ..
اهااااا
اسمامة ود حمد اللهو ود خالة كمال صاحب الباقر.. سمع طبعا الخبر امبارح من زوجته سمية ..
اها الليلة قام لاقى كمال .. قال ليهو ياخي والله يا كمال.. انت ماعندك صاحب .. ياخي الباقر ده زول باطل وخايب ساي .. وبتاع قوالات .. قال ليهو كيف يا اسامة ؟؟
قاليهو ياخي الراجل.. يمشي يقول للحريم .. هنادي بت ادريس سمعتها ماكويسة .. عشان كدا خليتها؟
قال ليهو القال ليك منو؟ .. قال ليهو ياخي امو كلمت العازة .. والعازة ماخلت زول ماقالت ليهو ..
كمال قال ليهو الزول ده كذاب والله . والله الزول ده صحاني من النوم ..سألني منها.. لانو شاكي فيها وبس .. ماعندو اي بينات .. لكن انا مابسكت على الموضوع ده والله ..
قال ليهو ماتسكت والله .. لانو الكلام انا حرقني شديد .. هنادي دي والله مافيها كلام .. والله لو في بت شريفة في البلد دي تكون هي .. ده كلام متفق عليه ..
لكن ياكمال .. الباقر جاب الكلام ده من وين؟ ..
كمال قال ليهو في اولاد سحاسيح كدا.. بحبو يتفاخرو بي البنات .. واظنهم كذبو فوقها بالادعاء .. عشان يتفاخرو وبس .. لكن اصبر.. انا والله امسكن ليك.. واحد واحد.. واعصرهم لمن يجيبو الزيت ..
الكلام ده لو وصل لاهل هنادي بحصل دم والله ..
الى اللقاء ..


 
 توقيع :



تعجز كل مفردات الشكر والإجلال للرائعة صاحبة الذوق العالي رؤى


رد مع اقتباس
قديم 20-03-2018, 04:51 PM   #8
الادارة



الصورة الرمزية يوسف مدير
يوسف مدير غير متصل

بيانات اضافيه [ + ]
 رقم العضوية : 11520
 تاريخ التسجيل :  Jul 2011
 أخر زيارة : اليوم (01:55 PM)
 المشاركات : 8,635 [ + ]
 التقييم :  5203
 الدولهـ
Sudan
 الجنس ~
Male
 SMS ~
1000
لوني المفضل : Blue
افتراضي



صراحة مدعومة
الحلقة 8
بقلم طارق اللبيب
الحلة كلها بقت ماعارفة تصدق كلام العازة الناقلاهو من ناس الباقر .. ولاتصدق كلام شروق الانفصمت في الحريم ودافعت عن صاحبتها دفاع مستميت ..
سمية زوحة اسامة بعد رجعت من ناس السرة والقهوة الملعونة .. كلمت راجلها بالحصل .. وانتشار الخبر في النسوان.. والكلام الحصل كلو والردحي بتاع شروق .. حتى كلام شروق عن ميادة بت العازة .. ما خلتو كلمت بيهو راجلا ..
الراجل بسمع فيها .. قال ليها انا كلمتك.. قلت ليك تاني ماتجيبي سيرة زول .. ياخي انت ماعارفة البتكلم في اعراض الناس يجي اليوم الناس تتكلم في عرضو؟ انتي ماخايفة على اطفالك ديل.. في يوم من الايام يجيبو ليك فيهم اتهامات مكذوبة ؟؟
انتي يامراة ماسمعتي من ستر مسلما ستره الله في الدنيا والاخرة؟
ياخي لو شفتي واحدة بي عينك بتعمل غلط .. ما المفروض تفضحيها .. او تشيلي خبرها بالحلة .. المفروض تلاقيها وتنصحيها وتوجهيهيا.. او على الاقل تكلمي اولياء امرها ..
قالت ليهو الكلام ماجبتو انا .. ولا الفتو انا من راسي .. الكلام ده انا سمعتو زي زي الناس .. قال ليها طيب .. انتي عارفة شنو يعني الافك؟ قالت ليهو وريني .. قال ليها الافك هو نقل الكلام البتسمعيهو في الناس .. اما التأليف اسمو البهتان .. والاتنين ديل من الكبائر .. وفيها عقاب في القانون .. وعقاب الله اشد ..
قالت ليهو استغفر الله العظيم.. تاني عاد انا خشمي وعندي .. لكن داير اسألك يا اسامة .. انت ميادة بت العازة دي صحي كدا؟
قال ليها اعوذ بالله منك انتي ياخي .. ياخي غوري من قدامي الله يشلك شليتي اعصابي .. والله انتي لو جاتك لعنة ب.. تجيك بي سبب البت الاسمها هنادي دي وحدها ربنا بنتقم منك ..
عاينت ليهو كدا .. وقالت ليهو شايفاك من البارح بتدافع ليها .. ان شاء الله خير؟ مايكون انت برضك خاتي عينك عليها ..
بس الزول ده قام .. وهاج في المراة .. وتف ليه في وشها ..وقرب يكفتها .. قال ليها اسمعيني كويس .. اقسم بالله العظيم.. لو بضمن ابوها يديني ليها.. اكان أتزوجها فوقك واحرق ليك فشافيشك ياحاقدة ..
الزول الاسمو اسامة حمد .. ده بقى اليوم كلو زعلان داير ينشق من الكلام القالوهو في هنادي ..
مشى الصباح لي بيت اهلو .. ساكنين في نفس الحلة طرف كدا .. يسلم على الوالدة .. عندو اخته متزوجة .. سألته من سمية زوجته..
قال ليها كويسة .. عاملة زعلان الليلة من الصباح .. قالت ليهو مالا ان شاء الله خير؟ ..
قال ليها ياها القوايل البتقول فيها .. وسيرة الناس الدايمأ في خشمها .. اخته قالت ليهو اوع يكون برضو بتتكلم في شمار هنادي بت منى؟
قال ليها انتي برضو سمعتي بالكلام؟ .. قالت ليهو كلام يتقال في قعدة ناس السرة .. اتأكد انو ملا البلد .. سمعنا بيهو .. وحتى قالو الناس القاعدة تطلع معاهم هنادي .. وكلام كتير...
غايتو حسبنا الله ونعم الوكيل عليهم الحريم ديل ..
قال ليها انتي بتعرفي هنادي كويس؟ قالت ليهو ايوة بعرفها..
والله من كانت في المدرسة ماعندها غير صلاتها وقرايتها.. بت والله مافيها اي كلمة .. لكن هسي ماعارفاها والله طولت منها ..
قال ليها والله هسي مافيها كلمة.. لو جات ماشة بالشارع ساي وشها مابترفعو من الارض .. ولو اتكلمت مع اي زول بتتكلم كلام زي السيف .. انتي قايلة نحن بنعرف اساليب البنات والله البت من مشيتها في الارض تتعرف .. خلينا بلاي ..
والله سمية خدامة لي هنادي ماتنفع .. تجي تتكلم فيها ..
اخته قالت ليهو انت مالك هسي زعلان كدي؟ هندي اختك ولابت عمك؟ اوع يكون عندك فيها نية عرس ؟
قال ليها ياريت والله .. انا اطول هنادي ؟ ساكنة جارتي وبعرفها زي جوع بطني والكلام حارقني والله ..
طلع طوالي ضرب تلفون لي كمال.. قال ليهو انت وين؟
قال ليهو انا في الزلط .. ماشي امدرمان .. قال ليهو ماشي لموضوع ضوروري ولا ماشي ساي؟
كمال قال ليهو والله ماضروري انت مالك؟ عايزني في شنو؟
قال ليهو لازم تجي نمشي نلاقي الباقر ده.. ونسأله من الكلام الطالقو فوق البت المسكينة دي ..
قال ليهو انت لسه في الكلام ده يا اسامة؟ .. قال ليهو يا كمال الخبر وصل ناس بيتنا .. والدنيا كلها تتكلم عن البت .. والكلام مؤلف والله الكلام ده حارقني في قلبي .. تعال ياخي ..
قال ليهو جاييك هسي ..
المهم الاتنين قعدو في صالون بتاع حلاقة.. حق واحد صاحبهم في شارع فرعي في الحلة .. والحلاق ذاتو طلع انو سمع الخبر من مراة اخوهو ..
يعني مافي زول في الحلة ما اتكلم في هنادي .. وهنادي لغاية الان ماعارفة الحاصل بي وراها.. وشروق ماكلمتها .. خايفة عليها من ردة الفعل ..
اها يازول اسامة قال لي كمال ..ياكمال والله انا ماعندي مصلحة في الباقر ولافي هنادي .. لكن والله الاشاعة في زول برئ حارة ..
اضرب للزفت ده.. خليهو يجي نسكتو من الكلام ده ..
كمال كررر ضرب لي الباقر .. قال ليهو يا الباقر تعال لينا .. في صالون النذير .. الباقر ما اتاخر جاهو طوالي ,,
الكلام ده ان قريب صلاة الضهر .. لقاهم التلاتة قاعدين ..
اسامة قال ليهو انت يا الباقر بتعرف شنو على هنادي ؟
قال ليهو هنادي ادريس؟ مالا كمان تاني ؟
قال ليهو يعني انت ماعندك خبر؟ عن الاشاعة الانت طلقتها في هنادي؟
قال ليهو اشاعة شنو يا اسامة؟؟ يازول قول يالطيف ..
قال ليهو يا الباقر .. انت قلت لامك.. انا خليت البت لانها ماتمام ..
وامك كلمت العازة .. والعازة قالت الكلام عن ناس السرة .. في التجمع بتاع القهوة ..
الباقر .قال ليهو لااااا حولاااا ..اولا" الكلام ده ماكدا .. اول حاجة هنادي هي الكلمت ابوها.. وقالت ليهو ماعايزة العرس ده .. وابوها جا كلم ابوي.. يعني هي الرفضتني ما انا .. تانيا انا قلت لابوي احسن الرفضت .
امي سألتني.. قلت ليها الشباب بتكلمو عنها ماكويس ..
اسامة قال ليهو شباب منو يا الباقر؟؟
نحن عايزين نشوف الكلام ده اخرو وين؟ .. قال ليهو والله الكلام ده قالوه ناس محمد ود رقية وصابر ..
قال ليهو ياخي انت تاخد كلام في هنادي .. من محمد ود رقيه؟
محمد ود رقية ده متين بقى راجل .. عشان يتكلم في بنات الناس؟ .. محمد ود رقية في نفسو هو شنو؟
وصابر نعلو صابر البسطل بالبنزين؟ انت يا الباقر والله زول تافه.. مع احترامي ليك ..
لكن انا والله الليلة الكلام ده احتمال اوصلو لي ابوك .. الباقر قال ليهو عليك يا اسامة .. ماتعمل لي مشكلة والله ابوي ده.. ممكن تجيهو ذبحة لو سمع الكلام ده ..خاصة لو عرف انو طلع من امي ولامني .. قال ليهو طيب امشي نادي لينا محمد ود رقيه .. ونحن منتظرين هنا .. واسامة بتكلم وهو زعلان زعل شديد ..
مشو نااااادو محمد ودرقية .. جاء مفلفل شعرو.. ومشيتو في الواطة مامشية رجال .. ولمن يقيف بنفنس كدا .. ويغز كوعو .. زي البنات ..
اسامة قال ليهو ده يا الباقر الزول البتصدق كلامو؟ يهودا؟؟
الباقر قال ليهو انت اسكت يا اسامة خليني اسأله براي ..
ساقو بعيد .. كدا على اخر الشارع قال ليهو يامحمد ياخي انا عايز في مشورة وانت عارف الحلة دي كلها .. انا عايز اتزوج هنادي رايك شنو؟ قاليهو ظريف مالو ؟ هنادي والله قنبلة .. قال ليهو طيب .. رايك فيها شنو يعني زولة كويسة ولالا ؟ انت صاحبي وماتدس علي حاجة .. قال ليهو لالا يازول دي نهائي مابتتعاطف .. انا مرة كانت عايزة تديني كف عشان عاينت ليها ابتسمت..
قال ليهو طيب انتو قبل كدا قلتو الزولة دي ماعنده مشكلة .. قال ليهو ده ياسر القال كدا ما انا .. قال ليهو طيب صابر موش قال برضو؟ .. قال ليهو صابر كذاب ساي .. هو ذاتو مالاقي يتكلم معاها حكى لي كم مرة ..
الباقر قال ليهو صراحة يامحمد.. انا سمعتك انت شخصيا .يوم بتتكلم عن هنادي .. وانا ح اقول الكلام ده لابوها .. الولد قعد يتنايص .. زي البت الرايحه منها حاجة ..عليك الله ماتقول ليهو .. والله انا ماقلت كدا ..قال ياسر ..
الباقر قال ليهو يلا امشي نادي لي ياسر .. لو اتاخرت انا بفتك لادريس النجار ينشر ليك راسك ده بالمنشار . اوعك تكلمو عايزنو في شنو؟
الولد مشى خايف ..هو شكلو كدا قدر هنادي في العمر .. او اصغر منها بسنة .. المهم ود رقيه مشى ينادي ياسر ..
والباقر جاء دخل الصالون .قال لي ناس اسامة وكمال ..قاليهم والله الولد طلع كذاب ومجرم .. وماعندو اي علاقة مع هنادي ..
لكن قال ياسر هو العندو علاقة معاها .. انا متأكد انو ياسر بكون جاري معاها سلك ..دقيقة بس نشوفو لمن يجي ..
اسامة قال ليهو يا الباقر.. اسمح لي اقول ليك.. انت زول قلبك وسخان .. انت نفسك تطلع هنادي ماكويسة .. لكن انا بخيب ظنك الليلة .. وياسر بتكلم معاهو انا ..
انت المفروض تتكلم معاهم بالسياسة.. ماتهرشهم عشان نعرف الحقيقة القال الكلام ده منو .. وهل صحيح ولا افترا ..
كمال بس قاعد متمحن يعاين ..
ود رقية ضرب تلفون للباقر قاليو ياسر قاعد في الزلط في دكان بشرة وقال ماجاي .. اسامة شال عصاية وقال ليهو بمشي ليهو الكلب ..
كمال هنا اتدخل ..قال ليهو يا اسامة خلوني امشي ليهو انا.. ياسر صاحبي شديد .. وممكن يحكي لي الحقيقة .. مهما كانت ..
الى اللقاء ..


 
 توقيع :



تعجز كل مفردات الشكر والإجلال للرائعة صاحبة الذوق العالي رؤى


رد مع اقتباس
قديم 26-03-2018, 08:17 AM   #9
الادارة



الصورة الرمزية يوسف مدير
يوسف مدير غير متصل

بيانات اضافيه [ + ]
 رقم العضوية : 11520
 تاريخ التسجيل :  Jul 2011
 أخر زيارة : اليوم (01:55 PM)
 المشاركات : 8,635 [ + ]
 التقييم :  5203
 الدولهـ
Sudan
 الجنس ~
Male
 SMS ~
1000
لوني المفضل : Blue
افتراضي



صراحة مدعومة
الحلقة 9
بقلم طارق اللبيب
كمال مشى لي ياسر العنيد في مكانه.. ياسر زول شر .. وراسو قوي ومابخاف .. وزول بتاع مجازفات . كلهم عارفين كدا .. لكن اسامة كان بدقو والله.. بس كمال راجل عاقل.. وعارف اسامة احمق .. عشان كدا قال يتلافى الموضوع ..
ياسر ضعيف كدا واحمر.. بس تلقاهوخاتي سيجارة في اضانو .. وكافي يد واحدة من يدين القميص ..
كمال لمن وصل.. لقى ياسر قاعد في دكان بشرى.. قال ليهو ياخي انت مالك مابتحترم الناس؟؟ نحن ناس اصحابك .. واسامة راجل اكبر من ..
يعني في داعي تعمل عنيد وتأبى تجي ؟ غايتو خيبت ظني .. انا قلت ليهم الزول ده بجيكم هسي ..
قال ليهو يا كيمو ياخي ود خالتك ده زول مفتري.. سلام في الشارع مابسلم علي .. يجي يقول لي تعال.. وانا اجيهو طوالي ؟؟ لو عايزني يجيني ..
قال ليهو انت محمد ود رقية ماكلمك عايزنك في شنو؟
قال ليهو ماكلمني.. لانو هو ذاتو ماعارف عايزني في شنو؟ قال ليهو ياخي موضوع بسيط.. في انسانة متهمنها زورا .. وعايزنك تورينا لو بتعرف عنها اي شي ..
قال ليهو دي منو؟ قال ليهو ياخي ارح .. هو موضوع بتاع زواج.. وناس طالبين منك نصيحة .. عشان على ضوء كلامك نشوف العريس يتقدم ولالا .. يعني موضوع ماخطير ..
ياسر قال ليهو طيب يلا ارح .. جدا والله العارفو بوريكم ليهو.. مابدس اي حاجة .. بس عاين .. بعدين ماتجيبو لي مشاكل .. انا خايف اقول ليك ماتنفع.. بعدين تمشو تقولو ياسر قال قال ..
كمال قال ليهو ان ياياسر مابتعرفني؟ انا اخوك من الليلة ولا من امس؟؟ ..
قال ليهو والله يا كميمو.. لو ما انت انا من محلي مابتحرك ..
المهم وصلو .. واسامة سأله سألو سؤال واضح.. قال ليهو يا ياسر
انت بتعرف هنادي ؟ قال ليهو ايوة بعرفها .. قال ليهو يلا احكي لينا بتعرف عنها شنو؟
قال ليهو والله مابعرف عنها شي كعب .. غير ناس محمد ود رقية بتلكمو ومحمد قال ماعندها مشكلة .. وكل مرة بقولو لي خش فيها .. الزولة دي بجي منها .. وانا فعلا حاولت اتواصل معاها .. لكن ابت ترد علي كلو كلو ..
وفي النهاية جليتها .. لكن انتو في شنو بالضبط كدا ؟
هنا الباقر قال ليهم الزول ده كذاب .. والله انا متأكد انو عندو معاها حاجة.. بس عايز يتستر عليها ..
طبعا ياجماعة بصراحة.. الباقر متمني هنادي تطلع زي ماهو قال .. عشان حاجتين ..
عشان الدعاية تطلع صحيحة .. ومايكون عليهو اي لوم.. ولا على امو في انهم قالو كدا .. وعايز الكلام يطلع صحيح عشان يسامح نفسو انو خلاها ..
اها هنا هسي بتكلم بي يقين انو ياسر كذاب ..
ياسر قال لي كمال عليك الله هاك التلفون ده .. وشوف رسايلي المرسلها لي هنادي شوفها ردت لي ؟
كمال شال التلفون ..قال ليهو افتح الرمز .. فتحو ليهو .. وكمال بقى يفتش .. لاقتو رسايل من رقم ..ما مسجل بي اسم ..
وقف في الرسايل دي .. وبقى يقرا فيها لقاها رسايل .. سيئة مع واحدة .. تافهة شديد .. والفاظ اسوء من السوء .. وكمال يقرا والجماعة منتظرنو ..
كمال رفع راسو عرقان .. وشكله مستاء.. من الوسخ الفي الرسايل وقال .. والله دي اسوء رسايل من بت تلاقيني في حياتي .. عاين لي ياسر كدا .. وقال ليهو يا ياسر يهدي رسايلك مع هنادي؟ ولا انا غلطان ؟ .
ياسر جا عاين للرسايل كدا.. واتفاجأ مفاجأة شديدة خلاص .. وبقى يرجف .. قال ليهو لالا دي ما ما ما هاهاهانادي ..
كلهم التلاتة استغربو في الربكة الحصلت لي ياسر .. لامن بقى يتمتم خلاص معناها انكشف المستور .. وشكله ياسر عامل ابو الستاير لي هنادي.. كمال قال لي الباقر ..
انت بتعرف رقم هنادي كويس يا الباقر ؟ ..
قال ليهو ايوة بعرفو شديد ..قال ليهو الباقر طلع تلفونك .. واكتب معاك الرقم ده .. ياسر مرتبك ومصر انو مافي زول يعرف الرقم ده.. قال ليهم لالا والله ده مارقم هنادي عليك الله ياكمال جيب التلفون ده دي اسرار ناس ..
قال ليهو امشي كدا .. والله نحن الليلة.. كان نوصل الكلام دي لي اخره ..
اسامة عاين لي ياسر بي حقارة.. وقال ليهو والله ياياسر.. الليلة لو ربنا داير يكسرك بالعصاية دي .. انا بكسرك واوديك البوليس ..
انت قايل بنات الناس لعبة .؟
نحن ذاتو عايزين نعرف.. لو هنادي دي كدا .. نكلم ابوها عشان ماتبوظ لينا الحلة دي ..
ياسر مصر اصرار شديد والله ياجماعة دي ماهنادي ..
وكمال مصر على الباقر .. يا الباقر ياخي طلع اكتب الرقم ده .. قال ليهو قول طيب الرقم كم؟
قال ليهو صفر تسعة مية واحد وخمسين .. وووووو ..
لمن كمل الرقم .. الباقر رفع راسو وطير عيونو .. ووقف علي حيلو وقعد .. وجاتو حالة غريبة .. وقال ليهو وقسما بالله الليلة ياياسر انا بضبحك زي الخروف . ياياسر .. ده رقم ليميا اختي صح؟ ..
كمال قال ليهو ايوة صح اسمها ليميا .. لانو كان في الرسايل بتكلم معاها بقول ليها يا لميا .. دي اختك بالله؟ سبحان الله .. سبحان الله ..
تضبح شنو يا الباقر؟؟ امشي اضبح اختك اول .. تعال شوفها كاتبة شنو؟ .. اعوذ بالله منكم انتو .. بناتكم بالطريقة دي؟ وهسي توسخو في سمعة هنادي بت ادريس ؟ سبحان الله صدق المثل ..السفيه نبذ الباشا..
الباقر شال التلفون وقرا الرسايل القراهن كمال كلهن .. وياسر واقف هناك جنب الباب وقلبو مقطوع .. واسامة حمد صابة فوقو مطرة .. الباقر بعد كمل الرسايل جدع التلفون . وقعد في الواطة وخت يديهو في راسه . اسامة قال ليهو تمام يا الباقر مبروك ..ضوق الكلام في العرض .. انت قايل ربنا غافل ؟
.. المهم هسي نحن جينا نبرئ هنادي المسكينة.. ظهرت الفضائح مالياك انت يا الشريف ود الشرفاء .. دحين الان قبل ماتمشي تتكلم مع اختك نحن طالبين منك طلب .. تمشي تبرئ ساحة البت المسكينة دي ..الحلة كلها شايلة خبرها ..وانتو الطلقتو الفضيحة فيها انت وامك ..
والا والله نحن نمشي نفت الرسايل دي في الحلة.. وخلي الحلة والله احتمال تلقاها في النت ..
ياسر جا داير يشيل تلفونو الواقع في الارض . اسامة خطف منه التلفون .. وقال ليهو امسك الغي الرمز ده هسي ..مسك التلفون وداير يمسح الرسايل .. اسامة قعلو منو .. وقال ليهو والله مافي ليك حل غير الشرطة يا كلب .
قال ليهو خلاص بلغيهو دقيقة .. والله يا اسامة الكلام ده كان زمان .. قال ليهو زمان شنو؟.. يهدي اخر رسالة امس بالليل؟
الغي الرمز ده يلا . المهم بالضغط ياسر شال الرمز برة .. والتلفون مسكو اسامة وابا يديهو ليهم ..
وقال لي ياسر .. تفتح خشمك .. انا بودي التلفون ده لناس الشرطة .. وادخلك في متاهة عمرك ماتمرق منها .. وفضايحكم تملا البلد ..
الباقر قال لاسامة .. اسمع يا اسامة .. بغض النظر عن اختي المسحت بي الارض.. وكسرت عيني .. امسح الرسايل دي .. واسترونا .. البت زي اختكم .. انا والله من هنا ماشي لي عمي ادريس في البيت .. واطلب منه السماح واقول ليهو انا عايز هنادي .. اسامة قال ليهو.. والله هنادي تاني تقبل بيك.. انا البس طرحة ..
احسن تحترم نفسك وتمشي على اهلك ..
قال ليهو انا لو مشيت البيت هسي.. والله ممكن ارتكب جريمة .. وماعارف اعمل شنو .. لكن والله الليلة ياليمياء.. انتقم منك انتقام ..
انا ح امشي اشيل تلفونها .. واديهو ابوي.. يقرا الرسايل وتاني ان شاء الله يشنقها ..
الى اللقاء ..


 
 توقيع :



تعجز كل مفردات الشكر والإجلال للرائعة صاحبة الذوق العالي رؤى


رد مع اقتباس
قديم 26-03-2018, 08:18 AM   #10
الادارة



الصورة الرمزية يوسف مدير
يوسف مدير غير متصل

بيانات اضافيه [ + ]
 رقم العضوية : 11520
 تاريخ التسجيل :  Jul 2011
 أخر زيارة : اليوم (01:55 PM)
 المشاركات : 8,635 [ + ]
 التقييم :  5203
 الدولهـ
Sudan
 الجنس ~
Male
 SMS ~
1000
لوني المفضل : Blue
افتراضي



صراحة مدعومة
الحلقة 10
بقلم طارق اللبيب
لمياء دي واحدة من التومات .. اخوات الباقر .. والحاصل في حياتها شنو .. الله اعلم .. بس الرسايل الاتلقت في تلفون ياسر .. كانت فظيعة ..
اهاااالمن اخوها نوى يكلم ابوها .. كمال لحقو في نهاية الشارع ...
قال ليهو يا الباقر دقيقة .. انا عايو اقول ليك كلام.. واجعلني من الناصحين.. ماتكلم ابوك بالموضوع ده .. لانو ابوك راجل كبير .. والزول الكبير معرض لاي جلطة.. سكتة غيرو .. انت كلم والولدة وريها الرسايل ..
وشيل التلفون من البت.. وامنعها استخدام التلفون .. واتكلم معاها .. وريها الغلط من الصح .. وريها التصرفات دي ما من مصلحتها .. والبت اهم حاجة ليها سمعتها .. لو البت فقدت سمعتها.. تاني مابتنفع بي قرش.. الراجل ما مشكلة في مجتمعنا .. لكن البت وضعها حساس ياخينا .. فهمت كلامي؟ .. يعني انت في الاول اتكلم معاها بس.. وراقبها تاني .. اتفقنا ياحبيب ؟
مشى كمال لي بيت اهلو.. وح نرجع ليهو ..
تعالو بي هنا نشوف .. هنادي .. لغاية الان طبعا قريب اربعة ايام والخبر منتشر بالحلة .. وماوصل هنادي .. ولا حتى اختها هدى الفي المدرسة .. مافي زول جاب ليها خبر .. وشروق نهائي ماجابت سيرة الكلام لي هنادي.. قالو (الكلام يصل الريف لامن يجي عند سيدو يقيف) .. يعني صاحب الشان آخر من يعلم .. شروق يوم جات لهنادي من الصباح .. واتونسن مع بعض .. قالت ليها اها يا هنادي.. الباقر مارد ليك خبر؟ قالت ليها ابدا والله ..
ماشاء الله خلاص الود لاقى حبو الاول.. ياشروق .. تاني انا يعمل بي شنو؟ ان شاء الله ربنا يسعده .. بس والله جهجهني معاهو ههه وتضحك ..
شروق عاينت ليها كدا وعيونا اتملن .. وخنقتها العبرة .. بالله شوف.. هم بقولو فيها شنو؟
وهي بتدعي ليهم بالسعادة .. ياخليلا ماجايبه خبر ..
قالت لها يا هنادي .. والله ربنا ح يعوضك احسن منه ..
هسي عليك الله القوام العندك ده ..والعيون دي.. عند منو في الحلة دي ؟ بس الباقر زي وهمي وماعندو حظ .. يلا في ستين ..
قالت ليها يا شروق انتي قايلة الامور دي مطلوقة ساي.. دي حاجات مقسمة من فوق ..
المهم في الموضوع انو شروق ماكلمت هنادي بالكلام الأتقال فيها..
وكانت متمنية انو هنادي الكلام ده مايصلا ..
اما الحاصل مع اسامة حمد وكمال اولاد الخالات .. طبعا اسامة شال تلفون ياسر .. والرسايل فيهو .. وياسر مشى مغبون .. وخايف تمام؟
كمال قال لي اسامة.. اسامة انت راجل عندك اعراض ياخي .. وعندك بنات ماتقرا الرسايل الفي التلفون ده كلها .. بس خلاص بعد قريت رسايل البت دي مافي داعي لكشف الباقي ..
نحن مادام عرفنا انو هنادي بريئة وبرئنا ساحتها.. مافي داعي لباقي الرسايل عليك الله ماتفتحها ..
ولو سمحتا عشان خاطري .. امسح الرسايل دي كلها .. مامعروف التلفون ده تاني يقع في يد منو.. امسحها ..
ورجع التلفون لي سيده .. واستر خلق الله .. ماعشان البت ولاعشان الباقر .. بس عشان عمك حاج عمر الراجل الضو
سيد القبيلة .. انا ماعايز مكانتو تهتز .
اسامة قال ليهو ابشر ياكيمو .. والله كلامك مابنزاد .. هاك امسح الرسايل.. ورجل للولد الخايب ده تلفونو .. بس ماتكلم الباقر .. تقول ليهو مسحناها ..
خليهو يكون خايف كدا عشان ينجبر يبرء البت .. هسي البيت هناك بكون فاير فوارة ..
كيمو شال التلفون .. وعمل مسح لجميع الرسايل حقة ليمياء .. على غيرا
ورجع التلفون لي ياسر .. وقال ليهو .. ابعد من بنات الناس ..

اها يازول الباقر مشى البيت .. خايف من الفضيحة الفي الموبايل .. وخجلان من اصحابه وعضبان وحاقد على احته الكسرت عينو وسودت وشو ..
لمن وصل مالقى التومات طلعن .. طوالي قعد مع امو.. وقال ليها .. انتي يا امي كيف بتمشي تقولي لي العازة انو الباقر خلى هنادي عشان سمعتها؟
انا ماعندي اثبات على الكلام ده.. في النهاية اكاذيب بتاعات اولاد ..
بعدين هي الخلتني انتي ناسية؟
المهم يا امي العازة مشت نشرت كلامك .. وملت البلد بالكلام الفاضي .. وقالت الكلام قالتو لي بت السيد .. ولدها الباقرقال ليها كيت كيت عن هنادي ..
.. وهسي الناس بتكلمو في بت الناس .. والكلام ده لو وصل لي ادريس النجار .. انتي عارفاهو زول احمق .. والله ممكن يغدر بي ويكتلني ..
الليلة كرعلي .. اول كلمة قالتها ..
المراة دي خافت خوف شديد خلاص.. وقالت ليهو العازة الله يلعنها .. انا والله وماكنت قايلاها بتشيل الكلام وتمشي تقولو ..
قال ليها انتي براك عارفاها.. وعارفة لسانها .. قالت ليهو اصبر يا الباقر .. انت ماتشيل هم.. انا بتصرف بي سرعة .. بكرة انا بمشي القهوة عند ناس السرة والبقولو بعرفو براي ..
قال ليها يا امي في موضوع تاني وصعب شديد .. وحارقني شديد .. احتمال ارتكب فيهو جريمة ..
بتك ليميا ماتمام ياحجة .. نحن بنفتش في رسايل الاولاد لقينا بتك مراسلة ياسر مصطفى .. ومرسلة ليهو كلام كلو تفاهو وقلة ادب ..
امو قالت ليهو كذاب .. انا بتي مستحيل تكون كدا .. قال ليها جدا بس خليها التجي .. وانا بشيل منها التلفون واوريك الكلام ..
وقعد حارسها .. لمن جات قال ليها ليمياء تعالي هنا.. وانتي يا امي تعالي احضري ..
اسمعي يا حقيرة ويا منحظة .. ده كلام شنو المرسلاهو لي ياسرده ..قالت ليهو ياسر منو؟ قال ليها انتي عارفة ياسر منو.. ماتعملي فيها هبلة عشان ما اضربك بالكرسي ده اجيب اجلك ..
البت قعدت تتنايص وعملت فيها ضحية اتهام ..قالت لامها اسمعي يا امي دي اتهام خطير وانا ما بسكت . امه قالت ليهو
أهدا يا الباقر ووريها بي رواقة ..
قال ليها انتي يا زفته .. مرسلة لي ياسر مصطفى كلام كلو غراميات وتفاهة .. وانا قريتو بي نفسي .. قالت ليهو منو ؟ انا ؟ انت شفت رقمي ده عندو ؟ جاب رقمي من وين؟ وارسل ليهو على ياتو اساس؟ ..
قال ليها جيبي التلفون ده هسي سريع .. قالت ليهو امسك التلفون
لكن والله ماتطلع لي منو الرسايل .. انا الا اوصل الكلام ده لابوي ..
شال منها التلفون.. وقدر مافتش في الرسايل.. بس مالقى اي حاجة .. كلها رسايل بينها وبين البنات ومافيها اي شي ..
قال ليها بتكوني مسحتيها.. يعني صعب المسح؟؟ .. لكن انتي ما منتبهة.. انو الرسايل بتكون في تلفون ياسر قاعدة.. وانا بجيبها وبجي بدمرك..
وهسي تلفونك ده تاني مابتشوفيهو بي عينيك ..
البت قدام امها .. ابت كلو كلو تعترف بالكلام .. ونكرتو حطب .. لمن الباقر مشى بي غادي .. لحقتو قالت ليهو اسمع يا باقر .. انا والله غلطانة.. انت اخوي اضربني اكتلني اضبحني.. بس ابوي مايعرف .. وانا بوعدك والله تاني تلفون في يدي مابشيلو .. بس امشي امسح الرسايل من تلفون ياسر.. مايعمل لي فضيحة عليك الله ياباقر ..
عاين ليها كدا باحتقار .. قال ليها كمان عندك لسان بتقولي لي كدا؟؟ والله بنات اخر زمن ..
قالت ليهو ماتعاين لي كدا ياخوي .. نحن في الهواء سوا..
انا عارفة رمز تلفونك.. وقارية كل الرسايل القاعد ترسلا لي البنات .. التفاهه البتقولا ليهن .. لكن مافي واحدة ماعرفت ليك الاهنادي.. عفيت منها ..قاعدة تديك في اخلاقك ههه
الباقر شال شبشبو.. وعايز يضربه قامت جارية ..
ووقفت ليهو جنب الباب قالت ليهو .. اصلو كدا النظام .. الولد البتكلم مع البنات .. الاولاد بتكلمو مع اخواتو ..
قال ليها اقسم بالله اانا ماح اخليك ماتضحكي لي .. انا ح اكلم ابوي .. حا اجيب الرسايل من ياسر.. وح افضحك لي حسين .. انتي عارفة حسين ممكن يعمل ليك شنو؟ ..
قالت ليهو والله انا بكلم ابوي بكل العافاهو عنك .. الود الاهبل خاف صدق؟
قال ليها اسمعي ياغبيطة .. بشرط واحد بس .. ممكن اسكت ..
قالت ليهو قول اخدمك بعيوني يافردة .. قول شرطك وانا بنفذه ..
قال ليها طبعا انتي عارفة القصة الحاصلة بيني وبين هنادي؟
قالت ليهو عارفاها بالتفاصيل .. لغاية يوم الرفض .. ولم سمعت البنات قالن عن هنادي شنو وشنو.. قلت ليهن والله هنادي اشرف واحدة فيكن .. بعرفها انابس.. مافي زول بعرفها غيري ..
وانت لمن بتمنع لينة اختي .. ما تلاقي هنادي.. انا كنت بضحك جواي .. لانو لينة مسكينة وماعارفة امورك ..
ليميا بتتكلم مع الباقر بكل وقاحة .. لانها ماسكة عليهو زلات مع البنات وقارية فايلو ..
لمن يكون ولي الامر لاعب بعروض الاخرين .. لن يستطيع حماية عرضه فاعتبرو يا اولى الابصار ..
اها ااا قال ليها يا ليمياء .. طبعا انا غلطت.. ورسلت لي هنادي رسالة عشان انهي العلاقة.. لاني بصراحة كنت شاكي فيها.. وهي فعلا بريئة .. والسبب كله الناس الكذابين امثال ياسر غيرو ..
الناس الهمهم يتكلمو في العروض .. وماعارفين الاضرار الممكن تنتج بسبب اكاذيبهم ..
فشنو .. هسي انا ندمت شديد .. عايزك لو بتقدري ترجعي لي المياه الى مجاريها .. وتمشي لي هنادي .. وتوريها حجم الندامة والاسى الانا حاسيهو ..
وقولي ليها انا مستعد اجيك.. وابوس الواطة تحت اقدامك .. قولي ليها قال ليك.. والله ماعندي زولة غيرك .. بس دي حركة عبيطة مني ساي ..
قالت ليهو يا الباقر اخوي .. انت مابتعرفني.. انا ممكن اقلب الخير شر والشر خير .. انت قايلني زي لينة المسكينة.. اصبر بس انا بخليها تضرب ليك براها .. بكرة بمشي ليها ..
تاني يوم اللهو يوم الاربعا .. ام الحسين بت السيد والدة الباقر مشت القهوة عند ناس السرة ..وليميا مشت لي ناس هنادي ..
وتعال شوف الحصل ^_^
الى اللقاء ..


 
 توقيع :



تعجز كل مفردات الشكر والإجلال للرائعة صاحبة الذوق العالي رؤى


رد مع اقتباس
إضافة رد

مواقع النشر (المفضلة)

الكلمات الدلالية (Tags)
مدعومة.., اللبيب, بقلم:, صراحة, طارق

أدوات الموضوع
انواع عرض الموضوع

الانتقال السريع

المواضيع المتشابهه
الموضوع كاتب الموضوع المنتدى مشاركات آخر مشاركة
يا وكيل الغافلين قصة يرويها طارق اللبيب غزال كردفان منتدى القصص والحكايات 3 26-06-2016 01:49 AM
رواية المسؤلية ....قلم طارق اللبيب BaSma منتدى القصص والحكايات 9 03-08-2014 02:31 PM
داء الثـــعـــالـــب *** رائعة طارق اللبيب (متجدد) سبارتاكوس منتدى القصص والحكايات 5 14-02-2012 01:15 AM
اللبيب والإشارة العمرابي منتدى الرياضة 1 19-11-2009 11:30 AM
صراحة ابواحمد المنتدى العام 4 22-10-2009 11:31 AM


Loading...

Powered by vBulletin® , Copyright ©2000 - 2018, Jelsoft Enterprises Ltd. TranZ By Almuhajir
Tynt Script Added by Leicester Forum
HêĽм √ 3.1 BY: ! ωαнαм ! © 2010
Protected by CBACK.de CrackerTracker

Security team

 
جميع مواد النيل الازرق من صور ومعلومات محفوظة جميع الآراء و المشاركات المنشورة تمثل وجهة نظر كاتبتها فقط , و لا تمثل بأي حال من الأحوال وجهة نظر الشبكة والمنتدى .