.:: إعلانات النيل الازرق ::.

أهلا وسهلا بك إلى منتديات النيل الازرق السودانية.
أهلا وسهلا بك زائرنا الكريم، إذا كانت هذه زيارتك الأولى للمنتدى، فيرجى التكرم بزيارة صفحة التعليمـــات، بالضغط هنا. كما يشرفنا أن تقوم بالتسجيل بالضغط هنا إذا رغبت بالمشاركة في المنتدى، أما إذا رغبت بقراءة المواضيع والإطلاع فتفضل بزيارة القسم الذي ترغب أدناه.
العودة   منتديات النيل الازرق السودانية > منتديات الأدب والفنون > منتدى القصص والحكايات

منتدى القصص والحكايات يختص بسرد القصص والروايات المختلفة

الإهداءات

إضافة رد
 
أدوات الموضوع انواع عرض الموضوع
قديم 13-12-2018, 11:45 AM   #1



الصورة الرمزية أمل عطا المنان
أمل عطا المنان غير متصل

بيانات اضافيه [ + ]
 رقم العضوية : 23510
 تاريخ التسجيل :  Nov 2018
 أخر زيارة : 24-12-2018 (02:58 PM)
 المشاركات : 218 [ + ]
 التقييم :  14
 الدولهـ
Sudan
 الجنس ~
Female
لوني المفضل : Darkmagenta
Sdse55 رواية ... ظلال الموت



رواية ظلال الموت


الكاتب مجاهد يوسف البشير



رواية بالعامية السودانية


جد مشوقة ومدهشة للحد البعيد



تابعوني وسأنزلها لكم كااااملة


 


رد مع اقتباس
قديم 13-12-2018, 11:46 AM   #2



الصورة الرمزية أمل عطا المنان
أمل عطا المنان غير متصل

بيانات اضافيه [ + ]
 رقم العضوية : 23510
 تاريخ التسجيل :  Nov 2018
 أخر زيارة : 24-12-2018 (02:58 PM)
 المشاركات : 218 [ + ]
 التقييم :  14
 الدولهـ
Sudan
 الجنس ~
Female
لوني المفضل : Darkmagenta
افتراضي الحلقة الأولى



حاج قسم السيد قام الدغش فجرن بكير والدنيا كبس العين ولا بتشوف سمح يتقحقح ساي ويتنحنح وجاب ابريقو اتوضأ وصلالو كم ركعات وأوتر وصنقر في تبروقتو يسبح ويستغفر ومنتظر الصبح ودي ياها عادتو بنوم بعد يصلي العشاء وبقوم زي الوكت دا يومي وفي قعدتو ديك سمع ليهو تبة زول بجري في الشارع بعند بيتو وحس نضمي ما بعيد لكن ما انفرز ليو وسمع باب ناس عبد الغني الجزار أليل الحوش حقهم انفتح عرفو طوالي من صوتو كلما يفتحو زول بسيك وبعد السييكة كمان عندو طقة تسمع طق في اضانك اكان انتبهتلو بس الليلة ما قال طق وأكان حاج القسم راخيلو أضانو
مرق يشوف في شنو برة ومع مرقتو من خشم الحوش شاف هناك مع لفة دكان علي زول واقف ومن شافو زاغ ، والقسم إتلفت يمين وإتلفت شمال ما شاف شي وسامع صوت نضمي يجي ويفوت زي البعيد وما بعيد
دخل اتناول قرجتو وبطاريتو واتلفح بي توبو داير يتفقد الفريق وتاوق بالحيطة لاولادو حسن والنور وبركات التلاتة بنومو في حوش الديوان لقى بركات وحسن نايمين علا النور مافي وعنقريبو فاضي بس ملايتو مكرفسة ظناو سمع النضمي زيو ومرق زاتو يشوف في شنو خابرو زاتو هميم جابدو هو
مرق حاج القسم من البيت وقبال ما يبعد شوية قلبو أكلو علي جناو النور رجع يصحي أولادو حسن وبركات ويسعلم منو
فتح باب الديوان وكان باب زنكي خفيف ما فوقو ترباس بتكلوهو بحجر ساكت دفرو ساي ودخل لقى النور نايم في فجتو قام فتحلو البطارية في وشو لقاو نايم يشخر جاء بوين ونام متين ما عرفو
قام اداهو تلكزات بقرجتو وناغم ليو ها جنى النور النور ولا حياة لمن تنادي النور في شخريو نومو تقيل خلاس خلاهو وفات
مرق من حوش الديوان وعاين تاني لقى نفس الزول القبيلك الفي كوع دكان علي منشحط يعاين وتاني من شاف حاج القسم زاغ والقسم مشى عليهو راسو عديييل وانكرب لمن وصل كوع الدكان علا ما لقى زول حاول يقص الدرب بس الدروب كانت كتيرة جمب الدكان ما انفرز ليهو ياتو الجديد من القديم خاصة هو زاتو نظرو ما ال بالحيل داك
وقف مسافة في فجتو ديك وعمل فيها زي الرجع بيتو ولبد بوراء الدكان سمع ليهو حس كرعين ماشات عليهو وبرطيعة بإنكرابة كدا زي برطيع السفنجة فجطك فجطك وبقت قريبة من الكوع تب علا سيدا فجأة وقف من المشي وما ظهر
حاج القسم اول حاجة فكر يمشي علي الكوع ويقبض الجاء دا علا تاني قال انصبر شوية امكن يمد رويسو واعرفو وللا يظهر كلو واناضمو لكن الزول ما ظهر وملص سفنجتو شالها في يديهو ورجع وبجاي حاج القسم قدر ما انتظرو رويسو ساي أبى يمدو
قام مشى علي الكوع تاوق ما لقى زول لكن هناك جمب زقاق بيت عبد الفضيل المؤذن شاف الزول يتدبى ولابس اسود في اسود مشى عليهو لكن داك دخل في الزقاق وسامع صوت جريهو
حاج القسم احتار ورجع مشى علي بيتو كان بيتو مطرف في طرف الحلة وفي خور ما بعيد من بيتو شديد مليان عشر وشاف فيهو زي الزول اللابس ليهو جلابية بيضاء وراقد قريب من العشر مشى عليهو براحة براحة وقبل يصل ناغم الزول منو الزول منو
مافي زول رد عليهو وصلو لقاهو راقد علي بطنو لكزو بعكازو ما اتحرك اداهو تاني تلكزات في كرعيو برضو ما اتحرك فتح البطارية في وشو لقاهو دا بلة ود حاج الجيلي ميت قام قلبو لقى جلابيتو حمرة وملانة دم
قال انا اخو البعبد الله حق دي مصيبة شنو دي لا حول ولا قوة الا بالله
وقبل يتحرك سمع صوت عبد الفضيل المؤذن الجاي من مكرفونات الجامع ينادي للنباه الاول وقف مسافة واتشهد وقلب بلة علي بطنو زي ما لقاهو واتأكد انو الجنى دا خلاس روحو سلمها تب وانقتل انقتل
مشى علي البيت حقو صحى اولادو التلاتة قال ليهم قوموا قومو آ جنوي حلتنا فوقها قتيل الليلة
قالوا ليهو المكتول منو دا ؟
قال ليهم بلة ود الجيلي
وبلة دا كان صاحب ولدو بركات شديد وداك نطط عيونو كبار مع انو سمع الاسم كويس وعرفو لكن تاني سعل ابوهو منو منو ؟
قال ليهم بلة ود الجيلي مالك طرشتا؟ وهداك مجدوع جمب العشر الفي الخور
بركات وحسن قاموا جاريين علي الخور والنور جاء داير يمرق يجري معاهم لكن ابوهو مسكو من يدو وقال ليهو كنت وين قبيل قبل ما انا جيتك ولكزتك وعملت لي فيها نايم ؟
النور اتكبكب وقال ليهو كنت وين كيف ؟ كنت نايم
حاج القسم فاتح ليهو البطارية في وشو والنور خاتي يدو مضاري بيها عيونو من النور عشان ما يجهرو
قال ليو كنت وين آ جنى عنقريبك كان فاضي وريني كنت وين ؟
النور نكر حطب وقال ليهو من محلتي دي ما اتحركت ولا شفتك لمن جيتني انا نمت بدري حتى اسعل بركات وحسن ان ما قالوا ليك نام بدري لاني نمت قبالهم وخليتهم يتونسوا
قال ما وكتو هسي امشي ألحق اخوانك وقول ليهم الجنازة ما تهبشوها وامشوا كلموا الجيلي ابوهو خلوا اهلو براهم يجوا يشيلوهو
بركات وحسن اول ما وصلوا بلة واتأكدوا انو هو وكلام ابوهم صاح بركات بكى وبطول حسو قعد يجعر والناس القراب قراب من الخور كلهم مرقوا عليهم


 


رد مع اقتباس
قديم 13-12-2018, 11:47 AM   #3



الصورة الرمزية أمل عطا المنان
أمل عطا المنان غير متصل

بيانات اضافيه [ + ]
 رقم العضوية : 23510
 تاريخ التسجيل :  Nov 2018
 أخر زيارة : 24-12-2018 (02:58 PM)
 المشاركات : 218 [ + ]
 التقييم :  14
 الدولهـ
Sudan
 الجنس ~
Female
لوني المفضل : Darkmagenta
افتراضي الحلقة الثانية



النور بعد مرق لحق أخوانو كلامو ما ريح أبوهو تب وقعد يفكر في ولدو دا وعلاقتو ببلة ود الجيلي والسبب البخليهو يكتل ود الجيلي شنو لو دا هو ، وقدر ما فكر ما لقى شيتن برطبهم مع بعض لانو داك اصغر منو ونديد بركات وصاحبو وبجيهم كتير يقنب معاهم في الديوان وكم مرة لقاهو معاهم ، واولادو ديل زاتم طيبين ومحترمين وهو واثق منهم ما ناس كتل ومشاكل وما فيىشي بخليهم يكتلوا ليهم زول
بركات في جعيرو وبكيهو داك علي صاحبو بلة والناس فوق ود الجيلي ملمومين فيهم الببكي وفيهم المحتار وفيهم والوشو مليان اسئلة وفيهم البساعل الكتلو منو الكتلو منو وكيف ومتين وزول ساي مد يدو علي الجنازة ورفعو مافي لمن جوا اهلو الجيلي واخوهو المكاشفي واولادهم رفعوهو جروا بيهو علي البيت والجيلي ابوهو دا كضم تب وكرعيهو ولا شايلتنو ولا مصدق والناس يتجاروا عليهو الفاتحة الفاتحة مرات يرفع يديو ومرات يتبلم ساكت
الصبح اذن والناس مشوا علي الجامع وبعد صلوا مرقوا علي بيت الجيلي الحلة كلها عن بكرة أبيها هناك متفنين ومتفرجخين قدام خشم بابو وجاء البواليس والناس مشوا معاهم لحدي الخور مكان لقوهو مكتول وشالوا معاهم الجنازة وفاتوا ومشوا معاهم ناس كتار من الحلة دخلو الجنازة علي الطبيب الشرعي شافها وشرحها وعمل اجراءاتو الدايرها وقال ليهم خلاس ادفنوهو ، بلة عندو أخوهو أكبر منو طوالي قال لو ما انعرف كتيلو ما بندفن لكن عمو وابوهو وأهلو قالوا اكرام الميت دفنو ما في شي بخلينا ما ندفنوا والله عالم وشاهد وعارف الكتلو منو والأمر بقى في يد البوليس حاليا وشالوهو ودفنوهو
البوليس بدأ التحقيقات واول ناس نادوهم حاج القسم وأولادو التلاتة وحاج القسم اصلو ما دس شي قال الكلام الحصل كلو ما نقص من شي علا ما ذكر الزول اللابس اسود الكان بتاوق جمب كوع دكان علي داك ولا جاب سيرة النور ولدو
وحققوا مع بركات برضو ومع اصحابو كلهم وسعلوهم لو عندو عداوة او مشكلة مع زول وكل مرة البوليس يجي يسوق واحد والجريمة غامضة شديد ما لقوا اي طرف خيط يمسكوا فيهو عشان الصورة تبين وتوضح
حاج القسم يوم المغيرب كدا ناغم لبركات وقال ليهو بدور اسعلك من واحد من اصحابك طويل كدا علا ما طويل شديد وبيتهم لو كنت في دكان علي وداير تمشي ليو بتمشي بعند الزقاق الجمب بيت عبد المعطي الأذان دا منو
بركات سرح وفكر مسافة قال ليهو الزقاق دا يا ابوي بودي الفريق داك كلو ما بقدر اعرفو دا كدا لكن وضح لي تاني اي حاجة كدا ما بنعرف
قال ليهو سمح الزول دا لمن يكون واقف هناك مثلا انت واقف جمب خشم بابنا دا وهو جمب دكان علي وعاينت ليهو بتلقاهو واقف وتاني رقبتو كدا علي كتفو الشمال وبعاين وزي الاريوش اريوش
بركات ضحك وقال ليهو والله يا ابوي ما عرفتو دا وصعب اعرفو كدا لكن خليني افكر واتذكر واشوف واسعل منو امكن اعرفو لكن هو مالو وداير بيهو شنو
قال ليهو خلاص خلاص خليهو واوعك تسعل منو زول نهائي خلاص امش انت علي اخوانك ونادي لي النور
بركات جاء قال للنور ابي دايرك والله ابوي دا اكان ذكرني تحقيق البوليس في كتلة بلة ترا زي دا بنادونا واحد واحد اجهز يا حسن انت بعدو وقعد يضحك
النور قام هامي ومتضايق قال ليهو ما قال ليك دايرني في شنو ؟
قال ليهو ما قال لي هداك هو امش اعرف براك
قال ليو سمح كان بقول ليك في شنو ؟
سعلني من واحد في الفريق داك
حاج القسم كورك ليهو النور النور
النور لمن انخلع وقلبو قعد يدق ومشى ليهو خايف


 


رد مع اقتباس
قديم 13-12-2018, 11:48 AM   #4



الصورة الرمزية أمل عطا المنان
أمل عطا المنان غير متصل

بيانات اضافيه [ + ]
 رقم العضوية : 23510
 تاريخ التسجيل :  Nov 2018
 أخر زيارة : 24-12-2018 (02:58 PM)
 المشاركات : 218 [ + ]
 التقييم :  14
 الدولهـ
Sudan
 الجنس ~
Female
لوني المفضل : Darkmagenta
افتراضي الحلقة الثالثة



النور فات لابوهو اداهو قروش قال ليهو امشي جيب لأمك سكر وحب شاي ولفتين شعيرية وتعال ، اول مرة ابوهو يرسلو الدكان وبركات قاعد ودي ما حصلت من كبر بركات وبقى يترسل والسكر والحب شاي ديل اكان بجيبن معاهو وهو جاي من صلاة العشاء غريبة قال وقبل يفوت غشى الديوان لبس طاقيتو ومرق
النور لقى عادل صاحبو قاعد جمب دكان علي سلم عليهو وقعد اتونس معاهو مسافة ورجع
عادل ود خال بلة المكتول وصاحب النور دا شديد وايام البكاء كان حزنان شديد علي بلة حتى كان شايل عكازو وحالف قدام ناس الحلة في الديوان كتيل بلة ما يخليهو ولو عرفو علا يضبحو شخخخخخ من اللضان للاضان
وقال لعمتو ام بلة دم ولدك يا عمتي ما بروح وانا مصيري اعرف الكتلو وانتقم ليهو منو
عادل دا كان بقرا في الثانوي مع النور واللتنين ما جابوا الجامعة علا ابوهو مرتاح قراهو بالقروش وطلع منها ما كملها وبقى عاطل والنور زاتو قاعد عاطل ساي في الحلة لا شغل لا مشغلة مرات بشتغل طلبة ومرات من البيت ما بمرق
النور رجع البيت وودى الشاي والسكر لامو وقبل يمرق من البيت ابوهو ناداهو قال ليهو قنب دايرك وما سألو كلو كلو ماسك سبحتو وسارح يسبح والنور يتململ ساي ولا قادر يقعد ولا بقدر يفوت ولا عارف ابوهو داير بيهو شنو
حاج القسم عاينلو وقال ليهو كاتل ود الجيلي مالك آ جنى ؟
النور انخلع لمن شهق ونطط عيونو وقال ليهو شنو؟!!
قال ليهو سمعتني مالك كاتل الجنى دا ؟
_اقسم بالله العظيم يا ابوي لا كتلتو ولا شتين
_ شوف واسمع كلامي دا سمح انا ان قايل بخليك كضاب ، دحين لو ما وريتني كنت وين ساعة كتلتو انا البوديك البوليس وهناك بقرروك بطريقتهم
_ابوي عليك الله ما تجيب لي مصيبة ساي والله انا الفار والضب ما قاعد أكتلن وقبل كم يوم لاقتي عقرب والعقرب دي موش مضرة يمين ابيت أكتلها وقلت اخليها تعيش وأي شي بعملو الا كتل الروح دي ودي حشرة ما كتلتها اجي اكتل لي زول ؟
_سمح كنت وين اليوم داك ؟
_نايم كنت نايم
لا ما كنت نايم يا كضاب وانا شفت سريرك كان فاضي وجيتو بعد انا مرقت لكن جيت بوين الله اعلم الا تكون تلبت بحيطة جيراننا ديل
_جج جيج جيرانا منن ديل البتلب بحيطتم كمان ؟
_مالك بتتمتم جيرانا ديل ناس ود البصير
_وديل البوديني ليهم شنو كمان وابوهم ود البصير زاتو كان مافيش
_مافيش فات وين وعرفتو كيف مافيش انا شفتو يوم البكاء في المقابر
_سامعو يتكلم مع علي سيد الدكان قال ليهو فايت الخرطوم وبجي بعد يومين
حاج القسم زرزر النور زرزرة شديدة خلاس وسعلو من الزول البتني رقبتو وبيتهم بمشي ليهو بعند الزقاق حق بيت عبد المعطي الاذان ما عرفو وبعد قريب ساعة ونص حتى فكاهو وقال ليهو امش
مشى الديوان عرقان ويجر في نفسو جر
حسن قال ليهو الحاصل شنو قال ليهو والله ابوي دا مفروض يكون وكيل نيابة وللا محقق والله زراني زرة كلب في تكل والله ساي مرقني منو
حسن قال ليهو اوعى يكون عرفك قاعد ..
النور عاين فيهو قوي وصر ليهو وشو وغمز ليهو علي بركات وغير طوالي الكلام
قال ليهو آي آي عرفني قاعد اشتغل مع التاج السكران يوميات
بركات عاين ليهم وهم زاتم عاينوا ليهو وعمل فيها رايح لكن عارف اي حاجة هو
تاني قال ليهم اتكلموا ساي انا عارف عارف
حسن قال ليهو عارف شنو ؟
قال ليهو عارف اي حاجة ما تفتكروني طيرة انا
النور نهرو وقال ليهو عارف شنو
بركات مرق وقال ليهو ما عارف شي خلاس خلاس والنور اصر الا يعرفو عارف شنو
قال ليهو عارفك قاعد تمشي وين بالليل وكنت وين يوم انكتل بلة
النور قال ليهو اها الا توريني انا كنت وين ؟
بركات مرق وقال ليهو مافي داعي اوريك خلوا الناس في حالها بس انا عارف
عادل جاء بيت ناس حاج القسم دق الباب وجاهو بركات فتحو ودخل معاهو علي الديوان
حاج القسم لمن شاف عادل جاهم في الدكان لقاهم ختوا الكشتينة دايرين يلعبوا قام سلم علي عادل ونادى بركات وقال ليهو لمن الجنى دا ياخد قعدتو معاكم وقبال ما يفوت تعال كلمني ولو لقيتني نايم صحيني قال ليهو سمح
لعبوا لمن قالوا بس وعادل اتعشى معاهم ولمن انتهوا بركات مشى لابوهو قبل عادل يفوت قال ليهو الزول دا ماشي يابا قال ليهو خلاس خلاس امشي انت
وحاج القسم عمل فوقها نايم
عادل مرق فات وبعد مسافة شوية حاج القسم مرق علي خشم الباب ولمن عادل قرب للفة دكان علي حاج القسم اتحنح ورمى ابريقو في طوبة وعادل اتلفت عليهو وعاين فيهو مسافة وحاج القسم دخل بيتو والمتوقعو لقاهو عادل وقف يعاين فيهو مسافة ونفس الوقفة وتنية الرقبة حقت الزول الشافو يوم كتلة بلة


 


رد مع اقتباس
قديم 13-12-2018, 12:24 PM   #5
مشرف سابق



الصورة الرمزية عركي
عركي غير متصل

بيانات اضافيه [ + ]
 رقم العضوية : 22092
 تاريخ التسجيل :  Oct 2016
 أخر زيارة : 22-07-2019 (09:49 PM)
 المشاركات : 895 [ + ]
 التقييم :  87
لوني المفضل : Cadetblue
افتراضي



وعلي سبيل الدهشة نتابع
بت عطا المنان


 
 توقيع :
وامشي بين الناس واتحسس خطواتهم
فالاحترام امنية تصارع خطواتي


رد مع اقتباس
قديم 13-12-2018, 02:40 PM   #6
الادارة



الصورة الرمزية يوسف مدير
يوسف مدير غير متصل

بيانات اضافيه [ + ]
 رقم العضوية : 11520
 تاريخ التسجيل :  Jul 2011
 أخر زيارة : 13-11-2019 (03:07 PM)
 المشاركات : 8,638 [ + ]
 التقييم :  5207
 الدولهـ
Sudan
 الجنس ~
Male
 SMS ~
1000
لوني المفضل : Blue
افتراضي



متابعين ان شاء الله...
خليكي قريييبة بسسس...
تقييمي المتواضع جدا. وتقدير بلا حدود . .
تحيااااااتي...


 
 توقيع :



تعجز كل مفردات الشكر والإجلال للرائعة صاحبة الذوق العالي رؤى


رد مع اقتباس
قديم 13-12-2018, 04:51 PM   #7



الصورة الرمزية خال فطومه
خال فطومه غير متصل

بيانات اضافيه [ + ]
 رقم العضوية : 21193
 تاريخ التسجيل :  Dec 2015
 أخر زيارة : 22-11-2019 (01:58 AM)
 المشاركات : 603 [ + ]
 التقييم :  10
لوني المفضل : Cadetblue
افتراضي



نتابع.....


 


رد مع اقتباس
قديم 16-12-2018, 11:39 AM   #8



الصورة الرمزية أمل عطا المنان
أمل عطا المنان غير متصل

بيانات اضافيه [ + ]
 رقم العضوية : 23510
 تاريخ التسجيل :  Nov 2018
 أخر زيارة : 24-12-2018 (02:58 PM)
 المشاركات : 218 [ + ]
 التقييم :  14
 الدولهـ
Sudan
 الجنس ~
Female
لوني المفضل : Darkmagenta
افتراضي



اقتباس:
المشاركة الأصلية كتبت بواسطة عركي مشاهدة المشاركة
وعلي سبيل الدهشة نتابع
بت عطا المنان

وعلى سبيل الفرح


أفرحتني


بحضورك


لا تنقطع


تقديري


 


رد مع اقتباس
قديم 16-12-2018, 11:40 AM   #9



الصورة الرمزية أمل عطا المنان
أمل عطا المنان غير متصل

بيانات اضافيه [ + ]
 رقم العضوية : 23510
 تاريخ التسجيل :  Nov 2018
 أخر زيارة : 24-12-2018 (02:58 PM)
 المشاركات : 218 [ + ]
 التقييم :  14
 الدولهـ
Sudan
 الجنس ~
Female
لوني المفضل : Darkmagenta
افتراضي



اقتباس:
المشاركة الأصلية كتبت بواسطة يوسف مدير مشاهدة المشاركة
متابعين ان شاء الله...
خليكي قريييبة بسسس...
تقييمي المتواضع جدا. وتقدير بلا حدود . .
تحيااااااتي...
صباحك سعادة


يوسف مدير


مشييت بعبيييد


لكن جيت تااااني


تقديري


 


رد مع اقتباس
قديم 16-12-2018, 11:41 AM   #10



الصورة الرمزية أمل عطا المنان
أمل عطا المنان غير متصل

بيانات اضافيه [ + ]
 رقم العضوية : 23510
 تاريخ التسجيل :  Nov 2018
 أخر زيارة : 24-12-2018 (02:58 PM)
 المشاركات : 218 [ + ]
 التقييم :  14
 الدولهـ
Sudan
 الجنس ~
Female
لوني المفضل : Darkmagenta
افتراضي



اقتباس:
المشاركة الأصلية كتبت بواسطة خال فطومه مشاهدة المشاركة
نتابع.....
و ســـ أتابع


إحترامي


 


رد مع اقتباس
إضافة رد

مواقع النشر (المفضلة)

الكلمات الدلالية (Tags)
الموت, رواية, غلاء

أدوات الموضوع
انواع عرض الموضوع

الانتقال السريع

المواضيع المتشابهه
الموضوع كاتب الموضوع المنتدى مشاركات آخر مشاركة
في ظلال اية غزال كردفان منتدى القران الكريم وعلومه 0 25-07-2014 12:33 PM
واجب المسلم نحو أخيه المسلم الذى يعالج سكرات الموت وبعد الموت حسن العجوز YouTube النيل الازرق 0 30-10-2012 05:30 PM
رواية سودانية جديده بعنوان( بين الموت والحب رصاصه) من تاليف عبدالرحمن الرشيد عبدالرحمن كمبالي منتدى القصص والحكايات 8 09-02-2012 07:07 PM
علاء علاءالدين عادل خوجلي المنتدى الإجتماعي 2 08-03-2010 10:34 PM
علاء علاءالدين عادل خوجلي المنتدى الإجتماعي 6 07-03-2010 01:24 AM


Loading...

Powered by vBulletin® , Copyright ©2000 - 2019, Jelsoft Enterprises Ltd. TranZ By Almuhajir
Tynt Script Added by Leicester Forum
HêĽм √ 3.1 BY: ! ωαнαм ! © 2010
Protected by CBACK.de CrackerTracker

Security team

 
جميع مواد النيل الازرق من صور ومعلومات محفوظة جميع الآراء و المشاركات المنشورة تمثل وجهة نظر كاتبتها فقط , و لا تمثل بأي حال من الأحوال وجهة نظر الشبكة والمنتدى .