منتديات النيل الازرق السودانية

منتديات النيل الازرق السودانية (http://www.blue-nil.net/vb/index.php)
-   منتدى الشعر (http://www.blue-nil.net/vb/forumdisplay.php?f=58)
-   -   لمّــــا تغيبي (http://www.blue-nil.net/vb/showthread.php?t=80927)

صلاح سيد أحمد الغول 16-12-2018 08:03 PM

لمّــــا تغيبي
 
لمّـا تغــيبي

........
لمّا تغيبي وما ألقاك
مكان النّاس بِلاقو النّاس
بتاوِق ليكى بين حرفِك
وأوراقِك
والاقيك بين عِناق الخاطره
والإحساس
وما بيناتنا
غير أشواقي واشواقِك
تتاكي الشّوق تشوفيني
تناغمي اللّهفَه في عيني
تناديها وتناجيني
مُقَدر ليكي تحويني
ومُقدّر لي أعيش جوّاكي
وسط الريّده خبّيني
وأريتك مرّه تَدّيني
كليمه تطيِّب الخاطِر
بِسيمه تشيلني تهرُب بَي
على رَفَّة جَناح نَسْمَه
تقرِّب لَيَّ يوم باكِر
وبين غفوات وعيد لَحظِك
أراوِغ رِمشِك الفاتِر
أحاوِل إدارى من نظرات
بِتَهبِش جوّه في الخاطِر
قُلتَ أجرِّب الحِكمه
واداري الرَّهبه في الزَّحمه
أقالد الخوف واصُد خاسِر
أطالِع روعة الرّسمه
واسبِّح قُدرة القادِر
عِشان خاطرِك
رميت بى شوقي لى قِدام
وقُلتَ تدُفري أشواقِك
يحالف الحظ و تَلقاني
ولو كان لمحَه في الأحلام
ولو بس طيفك إغشاني
وين ما يروح أروح ليهو
وزَي الضُّل أباريهو
أساريهو واناديهو
أرَجِّعو للدَّرِب تاني
ويوم قرّبتَ مِن بابِك
سِمِعتِك صوت في مِحرابِك
قراني حِكايه في كتابِك
حَكَتْ خوفِك وإعجابِك
وكُل الكُنتَ خايفو حَصَل
خطير الوضع ومُتَشابِك
رَهَنتو لِحِنكة الأيام
دمَجتَ حِسابي في حسابِك
وزَنتَ الشّوق لقيتو قليل
دَلَقتو وعبّا عِشرين نيل
وعُمر اللّهفه ألفين عام
وشوق ممدود يهِد الحيل
أعدتَ قِراءَة اللّوحه
مَزَجتَ رجاي بألواني
سِمعت نِدايَ مِن جُوّاك
نسيت كم مرّه ناداني
عِرفتَ غلاتي عندك كيف
وشِلتِك دُنيا في كياني
تعيش جُوّاي وأعيش فيها
ويخاطِر زَمَنِك أزماني
...........
من ديواني
(مزامير الحنين)

يوسف مدير 17-12-2018 08:10 AM

ولما تغيبي...
بتغيب معاكي كل ملامح الزمن
حتى الثواني تذوب
والايام تصبح وهن
وعينكي والهمسات
تمسي الوطن
وانا بينك وبين عيونك
القى الامان
القى السكن
وافتش عني جواك
القاكي جواي مدن
ما انتي كل الريد
وانتي ترياق المحن
انتي الملاك والزهور
والجمال
انتي السماحة
انتي الحضور....
اخوي الغالي صلاح...
تعبت انفاس كلماتي لهثا تبحث عن مخارج من متاهات الدهشة على تلكم اللوحة من هذه المزامير ..
متعك الله بالصحة والعافية...
تحياتي لك ملء دنان الاشواق واشياء اخرى...

صلاح سيد أحمد الغول 20-12-2018 12:56 PM

اقتباس:

المشاركة الأصلية كتبت بواسطة يوسف مدير (المشاركة 1027283)
ولما تغيبي...
بتغيب معاكي كل ملامح الزمن
حتى الثواني تذوب
والايام تصبح وهن
وعينكي والهمسات
تمسي الوطن
وانا بينك وبين عيونك
القى الامان
القى السكن
وافتش عني جواك
القاكي جواي مدن
ما انتي كل الريد
وانتي ترياق المحن
انتي الملاك والزهور
والجمال
انتي السماحة
انتي الحضور....
اخوي الغالي صلاح...
تعبت انفاس كلماتي لهثا تبحث عن مخارج من متاهات الدهشة على تلكم اللوحة من هذه المزامير ..
متعك الله بالصحة والعافية...
تحياتي لك ملء دنان الاشواق واشياء اخرى...

مالَك فَضَح سِر الحروف
وانا يا حِبَيِّب ساتِره ؟
الجوّه نارو بتِعتمِل
لَخبَط كيانه وبعثره
كُل ما أشوفه اتبكَمتْ
والعبره سادَّه حناجِره
بَخطِف نِعال الجَهجَهه
بفوته نفسي بَغادِره
بطلِق سراحه بحرِّره
وعشان أطيّب خاطِره
بركَب بُساط الإلتِزام
بكسيها قافيه تصبِّره
...........
تحيّاتي أخانا الفاضل وأستاذنا الأكرم ، يوسف مدير
حضورٌ باهٍ جمّلَ كلُّ مُحيطي فضَجَّ لهُ بِشراً وترحيباً وتهليلا


الساعة الآن 09:12 AM.

Powered by vBulletin® , Copyright ©2000 - 2020, Jelsoft Enterprises Ltd. TranZ By Almuhajir
Protected by CBACK.de CrackerTracker

Security team